У Магілёве прыбралі помнік Папу Яну Паўлу II. Але часова — толькі для рэстаўрацыі
Помнік пантыфіку ўсталявалі дзесяць гадоў таму, і за гэты час з'явіліся праблемы з пастаментам. Пасля рамонту скульптуру святара вернуць на пляцоўку галоўнай каталіцкай святыні горада — касцёла Унебаўзяцця Найсвяцейшай Панны Марыі і Святога Станіслава.
На знікненне помніка звярнулі ўвагу гараджане ў сацыяльных сетках. На фотаздымках бачна, што самой скульптуры няма, а пастамент нібы дэмантуюць.
Двухметровая постаць пантыфіка на пастаменце стаяла справа ад галоўнага ўвахода ў кафедральны касцёл.
Як удалося высветліць, нічога надзвычайнага з помнікам не адбылося. Парафія Унебаўзяцця Найсвяцейшай Панны Марыі і Святога Станіслава вырашыла, што надышоў час выправіць хібы пастамента. У ім спецыялісты выявілі мікратрэшчыны, якія маглі прывесці да большых праблем з помнікам. Пакуль будуць займацца пастаментам, адрэстаўруюць і двухметровую постаць пантыфіка.
На рамонт помніка збіраюць ахвяраванні.
Помнік Папу Яну Паўлу II усталявалі ля касцёла ў кастрычніку 2013 года. Так магілёўскія каталікі адзначылі гадавіну абрання ў 1978 годзе кардынала Караля-Юзэфа Вайтылы Папам Рымскім. Кіраўніком Рыма-каталіцкай царквы ён заставаўся да скону 2 красавіка 2005 года. У 2014-м святар быў кананізаваны.
«Наша Нiва» — бастыён беларушчыны
ПАДТРЫМАЦЬГлядзіце таксама:
У Магілёве падчас набажэнства граў на аргане сам мясцовы біскуп ВІДЭА
Ці будзе касцёл у Бабруйску належаць вернікам? Пакуль выглядае, што прынамсі не найбліжэйшым часам
Каментары