Польскі віцэ-міністр: Без вызвалення Пачобута ні пра якое паслабленне санкцый гаворкі не будзе
Намеснік міністра ўнутраных спраў Польшчы Мацей Вонсік даў інтэрв'ю Польскаму прэс-агенцтву, у якім не выключыў увядзення супраць Беларусі новых санкцый, калі рэжым Лукашэнкі не спыніць аптыпольскую палітыку.
«Польшча — акно ў свет для Беларусі. Хай Беларусь карыстаецца гэтым акном разважліва і рацыянальна. Мы не пагаджаемся ні на які пераслед польскіх дзеячаў. Будзем рэагаваць усё мацней», — заявіў Вонсік.
Таксама ён адзначыў, што Польшча чакае ад беларускага боку вызвалення Андрэя Пачобута. І толькі пасля таго можна будзе казаць пра магчымасць хоць бы якога паслаблення накладзеных санкцый.
Учора з'явілася інфармацыя, што з 1 чэрвеня і да асаблівага распараджэння Польшча закрывае рух праз беларуска-польскую мяжу для грузавых аўтамабіляў, цягачоў, прычэпаў і паўпрычэпаў, саставаў транспартных сродкаў, зарэгістраваных у Беларусі і Расіі.
Акрамя таго, кіраўнік МУС Польшчы вырашыў уключыць у санкцыйны спіс 365 прадстаўнікоў беларускага рэжыму, а таксама 20 структур і 16 прадпрымальнікаў, пераважна звязаных з расійскім капіталам.
Усё гэта — рэакцыя на рашэнне лукашэнкаўскага суда асудзіць журналіста і актывіста польскай меншасці ў Беларусі Андрэя Пачобута да васьмі гадоў калоніі ўзмоцненага рэжыму. 26 мая Вярхоўны суд Беларусі разгледзеў апеляцыю і пакінуў прысуд у сіле.
Каментары