У Новай Баравой з'явіліся незвычайныя арт-аб'екты. Іх стварылі знакамітыя архітэктар і скульптар
Нядаўна ў Новай Баравой з'явіліся дзве новыя скульптуры — чалавек, які мяняе лямпачку, і паветраны шар. Гэтыя арт-аб'екты — частка праекта A-100 Art, у рамках якога забудоўшчык інтэгруе мастацтва ў свае жылыя комплексы, піша Realt.
Два арт-аб'екты пад назвамі «Уверх» і «Мяняем святло» з'явіліся ўнутры кругавых скрыжаванняў на вуліцы Авіяцыйнай. Работы выкананы заслужаным архітэктарам Беларусі Юрыем Градавым і скульптарам Канстанцінам Селіханавым.
Наогул дадаваць мастацтва ў свае праекты кампанія «А-100 Дэвелапмент» пачала даўно. Спачатку гэта былі сціплыя малюнкі на фасадзе: памятаеце дзяўчынку з шарамі на фасадзе дома ў Сеніцы? Затым былі муралы ў Новай Баравой («Вітрувіянскі чалавек» і іншыя). Пазней справа дайшла да вядомых скульптур — чаек у «Пірсе» і жоўтых самалёцікаў у Новай Баравой.
«У 2019 годзе мы распрацавалі цэласную стратэгію па ўкараненні сучаснага мастацтва ў нашы жылыя комплексы. Так з'явіўся новы напрамак дзейнасці — А-100 Art, — адзначыла генеральны дырэктар ГК «А-100 Дэвелапмент» Святлана Шэўлік. — Мы сталі першым у Беларусі забудоўшчыкам, які пачаў інтэграваць мастацтва ў свае праекты на такім высокім узроўні. Напрыклад, у квартале DEPO ў лобі першых дамоў з'явіліся карціны беларускай мастачкі Таццяны Радзівілкі».
Што да з'яўлення арт-аб'ектаў у Новай Баравой, то гэтай падзеі папярэднічала вялікая праца: конкурс, дзясяткі ўдзельнікаў, журы, строгі адбор. У выніку ўсіх дыскусій у квартале было вырашана ўстанавіць дзве скульптуры.
Кампазіцыя «Уверх» уяўляе сабой яркі паветраны шар, які імкнецца ўзняцца ў неба.
«Мяняем святло» — таксама ўвасабленне абнаўлення, руху ўверх і развіцця.
У А-100 Art паабяцалі, што квартал чакаюць і новыя эксперыменты.
Чытайце таксама:
Стала вядома, як зменіцца 2-я паліклініка ў Мінску
«У трэндах дачы». Эксперты расказалі, што адбываецца з продажам дамоў і што будзе далей
За колькі купляюць кватэры ў элітным новым квартале каля плошчы Перамогі?
Каментары