У Літве абураныя суседзі выселілі з-за шуму пеўня, які пяць гадоў жыў з курамі і спяваў штораніцу
Злы сусед не паленаваўся ўстаць у 4:30 і зняць на відэа пеўня і яго гаспадароў, а потым размясціць відэа ў фэйсбуку.
У адной з вёсак пад Вільняй пеўня, які пяць гадоў жыў у сваім куратніку і спяваў раніцай, адсялілі ад курэй і гусей, бо суседзі сталі скардзіцца на тое, што певень не дае ім спаць, піша Delfi.
Інцыдэнт адбыўся недалёка ад горада на хутары.
«Два дні таму наш певень пракукарэкаў а 4-й раніцы. Суседзям гэта не спадабалася, яны размясцілі відэа ў групе нашай грамады ў фэйсбуку і пачаліся непрыгожыя дзеянні», — распавяла Рыма.
Паводле яе слоў, певень у іх жыў ужо пяць гадоў, увесь гэты час яго спевы нікому не перашкаджалі. Пасля выпаду суседа Рыма з мужам аддалі пеўня іншаму суседу.
Ці ёсць у пеўняў права раніцай кукарэкаць у вёсцы ці за горадам, на хутары?
«Няхай суседзі прыстасоўваюцца, прывыкаюць да пеўня», — сказаў журналістам адзін з жыхароў.
«Можа, крыкун і не патрэбны, але калі крыху паспявае з раніцы, няхай. Бо трэба ведаць, што надышла раніца», — сказала адна з жанчын.
«Гэта двор пеўня, што хоча, тое і робіць», — пракаментавала сітуацыю іншая жанчына.
«Мне пеўні не перашкаджаюць. Можа, трохі перашкаджаюць сабакі, што брэшуць без справы. Я не супраць, калі побач са мной будзе спяваць певень», — зазначае іншы вясковец.
— А калі раніцай, а пятай раніцы?» — «Нават і ў 4:30», — сказала адна жыхарка Вільні.
«Трэба паглядзець Кодэкс адміністрацыйных правапарушэнняў, можна прыцягнуць да адказнасці пеўня за спевы ці не», — сказаў мужчына.
Рыма пакуль аддала пеўня суседзям, якія трымаюць курэй і іншага пеўня. Жанчына сказала, што пеўні пасябравалі.
Але на другі дзень певень знік.
«Я засумавала, гэта быў наш гадаванец, мы яго выгадавалі. Я спадзяюся, што ён вернецца», — сказала Рыма.
Жыхары вельмі спадзяюцца, што певень вернецца, але асцерагаюцца, як бы ён не трапіўся ў лапы лісе.
Калі Канапацкая стала падкантрольная Лукашэнку? Расказваюць яе сябры2
Каментары