У Мінску і ваколіцах з'явяцца чатыры новыя дзіцячыя садкі: дзе і калі
Намеснік старшыні Мінгарвыканкама Аляксандр Чэрнікаў у інтэрв'ю «Мінск-Навінам» распавёў пра дзіцячыя садкі, якія пабудуюць у сталіцы і яе ваколіцах у найбліжэйшы час.
Усяго іх будзе чатыры. Дзіцячыя садкі ўзводзяць у раёнах, якія актыўна забудоўваюцца. Адзін з іх размесціцца ў мікрараёне Дружба (на вуліцы Чурлёніса), другі — у Навінках.
Па адной дашкольнай установе з'явіцца ў Сокале і горадзе-спадарожніку Смалявічах. Увесці ў эксплуатацыю ўсе гэтыя аб'екты плануюць да канца гэтага года.
Таксама да 1 верасня ў Мінску адкрыецца некалькі школ пасля капрамонту, але новых да навучальнага года не з'явіцца. Пра гэта заявіў намеснік старшыні камітэта адукацыі Мінгарвыканкама Глеб Лаўрыновіч.
Адна новая школа на 720 месцаў адкрыецца ў Сеніцы (Мінскі раён).
У Заводскім раёне пасля капрамонту зноў прыме дзяцей школа №210, у Маскоўскім — абноўленая гімназія №146.
А вось доўгачаканую школу ў мікрараёне Лебядзіны (на 1020 месцаў) дабудуюць у 2024 годзе.
Каментары