Адзін з сусветных трэндаў — рост плацяжоў з выкарыстаннем біяметрычных дадзеных. Біяметрыя заваёўвае папулярнасць і ў сектары фінансавых паслуг як альтэрнатыва пароляў і PIN-кодаў.
Паводле інфармацыі партала biometricupdate.com, аб'ём плацяжоў з выкарыстаннем новых тэхналогій чатыры гады таму складаў 228 млрд долараў, а да наступнага года вырасце да 2,5 трлн долараў. Іх доля сярод усіх такіх аперацый дасягне 60 працэнтаў.
Гэтыя тэхналогіі паступова атрымліваюць развіццё і ў Беларусі. Пра гэта ў сваім артыкуле распавядае выданне «Беларусы і рынак»
Як паведамляе ilex.by, у Нацыянальным банку ўжо пратэставалі біяметрычныя плацяжы. Пілотны праект рэалізавалі ў сталовых і буфеце цэнтральнага апарата рэгулятара, дзе можна было разлічыцца «тварам».
Усё больш праектаў з выкарыстаннем біяметрычных даных у прадпрыемствах гандлю, сэрвісу, грамадскага транспарту. Беларускія банкі не стаяць на месцы. Адзін са свежых прыкладаў — у мабільным дадатку «РРБ Банка» даступна біяметрычнае пацверджанне плацежных аперацый з дапамогай адбітка пальца або распазнання асобы. Чалавеку не трэба кожны раз чакаць sms-код ці ўспамінаць пароль пры здзяйсненні плацяжу.
Для паўнавартаснага ўкаранення біяметрыі неабходны ўдзел органаў-рэгулятараў. Напрыклад, неабходно вырашыць пытанне з ухваленнем размяшчэння біяметрычных даных у вонкавых сховішчах профіляў карыстальнікаў, адзначае знешні кансультант сістэмы электронных плацяжоў WEBPAY Віталь Рубанаў.
Нацбанк Беларусі, як рэгулятар, на падставе праведзенага пілота і банкаўскай практыкі «шліфуе» заканадаўства, каб улічыць розныя нюансы.
Адным з асноўных напрамкаў развіцця біяметрычных тэхналогій у бліжэйшай перспектыве стане выкарыстанне ў сістэмах дыстанцыйнага банкаўскага абслугоўвання і ў міжбанкаўскай сістэме ідэнтыфікацыі (МСІ) біяметрычных дакументаў, у ліку якіх ID-карта, паведаміў намеснік старшыні праўлення Нацбанка Дзмітрый Калечыц.
«Сапраўднай праблемай сёння з'яўляецца адсутнасць счытвальніка ў кожнага грамадзяніна, які атрымаў ID-карту. Для забеспячэння даступнасці грамадзянам дыстанцыйных сэрвісаў цяпер неабходная распрацоўка мабільнага дадатку, які забяспечыць атрыманне даных з ID-карты грамадзяніна або біяметрычнага дакумента нерэзідэнта для правядзення іх ідэнтыфікацыі, верыфікацыі і аўтэнтыфікацыі», — адзначыў Калечыц.
Акрамя таго, пашырацца магчымасці па выкарыстанні ў гэтых мэтах міжбанкаўскай сістэмы ідэнтыфікацыі юрыдычнымі асобамі.
«Аднак любая выдаленая ідэнтыфікацыя нерэзідэнтаў нашай краіны не можа быць паўнавартаснай без якаснай верыфікацыі персанальных даных. З гэтай мэтай працягнецца праца па ўзаемадзеянні сістэм ідэнтыфікацыі краін — удзельніц ЕАЭС» — дадаў намеснік старшыні Нацбанка.
Што яшчэ хвалюе бізнес і спажыўцоў
Адна з пераваг біяметрычных плацяжоў — хуткасць, прастата і зручнасць бескантактавай аплаты для карыстальніка. Можна забыцца на бясконцыя паролі і не мець пры сабе банкаўскую картку.
Даследаванне Mastercard паказала, што 64% апытаных спажыўцоў гатовы выкарыстоўваць біяметрычныя плацяжы праз зручнасць, але маюць асцярогі наконт таго, хто мае доступ да іх даных. Людзі таксама непакояцца, што іх унікальнымі характарыстыкамі скарыстаюцца зламыснікі ў выпадку ўцечкі інфармацыі ці тыя даныя, што трапяць у сістэму, нельга будзе змяніць у выпадку надзвычайнай сітуацыі.
Эксперт фінансавага рынку Анастасія Лузгіна лічыць, што біяметрыя дазваляе скараціць долю махлярскіх аперацый. Выкарыстанне асобы або іншых біяпараметраў у якасці ідэнтыфікатара абмяжоўвае магчымасці зламыснікаў. У той жа час яна адзначае, што карыстальнікі не застрахаваны ад таго, што ў самы нязручны момант можа «завіснуць тэлефон, адбыцца збой у прыладах або змяніцца твар чалавека, напрыклад, з-за алергіі». Тады цяжка будзе правесці плацёж. Таму спецыялісты раяць мець для такіх выпадкаў альтэрнатыўны варыянт аплаты.
Анастасія Лузгіна лічыць, што хуткасць укаранення біяметрыі будзе залежаць і ад таго, наколькі бізнесу — тым жа крамам — гэта будзе эканамічна выгадна.
«Трэба параўноўваць выдаткі на абсталяванне, тарыфы, колькасць пакупнікоў, і па выніку які эфект атрымаюць», — растлумачыла ilex эксперт.
Віталь Рубанаў таксама адзначае, што для бізнесу ў новай тэхналогіі ёсць як станоўчыя, так і негатыўныя моманты. Да прыкладу, сучасныя смартфоны, якія прымяняюцца для правядзення падобных транзакцый, могуць быць у тры разы таннейшымі, чым звыклыя POS-тэрміналы і значна зручнейшыя ў абслугоўванні. Аднак для біяметрыі дзейнічаюць павышаныя стаўкі абслугоўвання аперацый.
Эксперты мяркуюць, што на першым этапе ўкараненне біяметрычных плацяжоў стане іміджавымі акцыямі, як гэта адбывалася з запускам кас самаабслугоўвання. Паступова рытэйл убачыў у гэтым выгаду.
Каментары