Навальны, Яшын і Кара-Мурза заклікалі адмовіцца ад ежы 30 кастрычніка ў падтрымку расійскіх палітвязняў
Расійскія апазіцыянеры, якія адбываюць працяглыя тэрміны пазбаўлення волі ў калоніях, заклікалі праявіць салідарнасць з палітвязнямі і 30 кастрычніка адмовіцца ад прыёму ежы, піша Бі-бі-сі.
«30 кастрычніка 1974 года палітвязні Кранід Любарскі і Аляксей Муржэнка ў Дубраўлагу заснавалі дзень палітычнага зняволенага, каб дамагчыся прызнання статусу палітвязня, адмены абмежаванняў у перапісцы, пасылках і перадачах, павелічэння колькасці спатканняў са сваякамі, атрымання паўнавартаснай медыцынскай дапамогі, — распавядаецца ў тэлеграм-канале асуджанага на 19 гадоў Навальнага. — Галоўным жэстам салідарнасці ў гэты дзень стала сімвалічная аднадзённая галадоўка, якую трымалі не толькі палітвязні, але і многія вольныя людзі».
Пасля распаду СССР замест дня палітвязня сталі праводзіць Дзень памяці ахвяр палітычных рэпрэсій і акцыю «вяртанне імёнаў», якую арганізоўваў «Мемарыял». «Мемарыял» ліквідаваны па рашэнні суда, нагадаў Навальны, а палітвязні зноў ёсць — «і шмат».
«У гэтай сітуацыі мы лічым правільна і нам звярнуцца да каранёў і традыцый», — заявіў Навальны, які адбывае 19-гадовы тэрмін. Пад зваротам падпісаліся іншыя асуджаныя расійскія палітыкі і актывісты — Уладзімір Кара-Мурза, Вадзім Астанін, Лілія Чанышава, Даніэль Халодны і Ілля Яшын.
У Беларусі гістарычна Дзень палітвязня ўшаноўваецца 29 кастрычніка. У ноч з 29 на 30 кастрычніка 1937 года ў Мінску былі расстраляныя 108 прадстаўнікоў беларускай інтэлігенцыі: паэты, пісьменнікі, навукоўцы, дзеячы культуры. Кожны год беларусы ладзяць імпрэзы, прысвечаныя гэтай трагічнай даце.
Цяпер чытаюць
Што здарылася з Мікітам Мелказёравым, які раптоўна памёр сёння ноччу?26
Каментары