Лябедзька пра сына-палітвязня: Гэта не бравада, я гатовы абмяняць сябе на яго
Дарадца Святланы Ціханоўскай Анатоль Лябедзька ў праграме «Сварка-шоу» заявіў, што гатовы ўвайсці ў спіс людзей, якіх улады могуць абмяняць на палітвязняў, сярод вызваленых павінен быць яго сын.
Анатоль Лябедзька кажа, што яго сын сядзіць замест яго: «І гэта мой таксама крыж, які я нясу».
Але палітык дадае, што ўсё роўна не адыходзіць ад сваёй пазіцыі. Ён лічыць, што санкцыі, адначасовы ціск і з боку амерыканцаў, і з боку еўрапейцаў, могуць спыніць рэпрэсіі. Бо Лукашэнка «можа спыніць рэпрэсіі адным пстрычком пальцаў, адным росчыркам свайго пяра».
І калі казаць пра сітуацыю з сынам, то, па словах палітыка, ён асабіста гатовы пайсці ў турму замест сына.
«Я гэта чуў таксама як частку дыскусіі: ёсць чорны спіс для ўлады. Я гатовы ўвайсці ў гэты спіс улады, у абменны спіс, быць побач з іншымі — няхай будзе дзесяць для Лукашэнкі так званых нягоднікаў. І давайце мы іх абмяняем. Я гатовы, што калі іх абмяняюць там на палову зняволеных, якія сядзяць, і сярод іх будзе мой сын — я гатовы ісці туды. Я гатовы ісці туды, адкуль выйшаў Ціханоўскі. І гэта не нейкая бравада. Я адказваю, бо я кажу гэта публічна», — сказаў ён.
Сын Анатоля Лябедзькі Арцём быў затрыманы паводле абвінавачання ў фінансаванні так званай экстрэмісцкай дзейнасці. Яго судзілі за данаты ў тры фонды салідарнасці ў 2020 годзе.
24 жніўня 2023 года Арцёму прызначылі тры гады і шэсць месяцаў калоніі ва ўмовах узмоцненага рэжыму. Ён быў унесены МУС у «спіс экстрэмістаў».
Джон Коўл прыедзе ў Беларусь 15 верасня. Лукашэнка, аднак папярэдзіў: «вялікай здзелкі» не будзе11
Каментары
1. Варыянт "Ты прыязджай, а мы выпусцім сына": на даверы, якога не можа быць. Падмануць.
2. Варыянт "Дыпламаты на мяжы абмяняюць": ніхто з заходніх дыпламатаў не возьме на сябе транспарціроўку нявіннага чалавека ў дыктатуру.