Пастаянны прадстаўнік Расіі пры міжнародных арганізацыях у Вене Міхаіл Ульянаў заявіў, што Фінляндыя, якая дзесяцігоддзямі захоўвала нейтральны статус, пасля ўступлення ў НАТА стала «варожым гульцом».
У Расіі пагражаюць, што ў выпадку эскалацыі напружанасці паміж Расіяй і НАТА першай краінай, якая пацярпіць, будзе Фінляндыя, піша «Еўрапейская праўда».
«Яны жылі спакойна і мірна і раптам апынуліся паміж Расіяй і НАТА як сябра гэтага альянсу, але паколькі яны зʼяўляюцца нашымі суседзямі, калі, не дай божа, адбудзецца нейкая эскалацыя, яны пацярпяць першымі», — сказаў Міхаіл Ульянаў.
У гэтым месяцы Расія ўжо перасцерагла Фінляндыю з-за новага абароннага пагаднення, якое дае ЗША шырокі доступ да фінскай мяжы з Расіяй. Таксама паведамлялася, што Расія неўзабаве разгорне свае найноўшыя гаўбіцы ў Паўночнай ваеннай акрузе, якая мяжуе з Фінляндыяй і Нарвегіяй.
17 снежня Прэзідэнт РФ Уладзімір Пуцін паабяцаў праблемы Фінляндыі. «Праблем не было. Цяпер будуць. Бо мы цяпер будзем ствараць Ленінградскую ваенную акругу і канцэнтраваць там пэўныя вайсковыя падраздзяленні. Навошта ім гэта трэба, глупства нейкае проста», — сказаў прэзідэнт РФ.
Фінляндыя стала сябрам НАТА 4 красавіка. Краіна падала заяўку на ўступленне ў Паўночнаатлантычны альянс пасля поўнамаштабнага расійскага ўварвання ва Украіну ў лютым 2022 года. Датуль Фінляндыя захоўвала нейтральны статус.
Цяпер праз мігранцкі крызіс Фінляндыя закрыла памежныя пераходы на мяжы з Расіяй.
А мы вам казалі: «не думайце, што гэта капейкі»! Сталі вядомыя звесткі, колькі падаходнага беларусы Літвы пералічылі розным грамадскім структурам24
Каментары