Прэзідэнт Літвы схадзіў на мюзікл за кошт дзяржавы і нарваўся на непрыемнасці

Галоўная камісія па службовай этыцы ў аўторак пастанавіла, што Гітанас Наўседа і пасол у Вялікабрытаніі Эйтвідас Баярунас, наведаўшы мюзікл «Прывід оперы», парушылі Закон аб узгадненні грамадскіх і прыватных інтарэсаў. Камісія пастанавіла, што наведванне насіла прыватны характар, пры гэтым аплачана яно было за кошт сродкаў пасольства, піша Delfi.lt.

«ГКСЭ на пасяджэнні аднагалосна пастанавіла, што прэзідэнт Літоўскай Рэспублікі Гітанас Наўседа і амбасадар Эйтвідас Баярунас парушылі палажэнні Закона аб узгадненні грамадскіх і прыватных інтарэсаў», — заявіў журналістам у аўторак старшыня ГКСЭ Гедымінас Сакалаўскас.

У выніку расследавання была зроблена выснова аб тым, што прэзідэнт Наўседа скарыстаўся сваім статусам і становішчам у асабістых мэтах — для атрымання квіткоў на спектакль.

Квіткі на спектакль для прэзідэнта і яго жонкі таксама варта лічыць незаконным падарункам, што забаронена законам аб узгадненні грамадскіх і прыватных інтарэсаў.

«Камісія выявіла парушэнні двух артыкулаў. Першае — ён скарыстаўся сваім службовым становішчам і службовым статусам для атрымання асабістай выгады, а другое — таму, што ён незаконна прыняў падарунак, прымаць які забаронена законам», — заявіў старшыня ГКСЭ. Камісія таксама пастанавіла, што Э. Баярунас парушыў палажэнні закону, якія абавязваюць яго бесстаронне, сумленна і добрасумленна выконваць службовыя абавязкі. Гэтыя палажэнні таксама забараняюць выкарыстанне службовага становішча і службовага статусу ў асабістых мэтах і дазвол іншым асобам выкарыстоўваць маёмасць, якая належыць дзяржаве або муніцыпалітэтам, у іншых мэтах акрамя службовых, падкрэслівае ГКСЭ.

Адносна амбасадара камісія заявіла, што былі парушаныя патрабаванні 3 артыкулаў. Першае, што ён неналежна выконваў свае службовыя абавязкі, другое, што ён таксама выкарыстаў сваё службовае становішча і статус у асабістых мэтах, і трэцяе, што ён выкарыстаў і дазволіў выкарыстоўваць дзяржаўную маёмасць у іншых мэтах акрамя службовых», — сказаў старшыня ГКСЭ. Наведванне тэатра прэзідэнтам, паслом і іх жонкамі ў маі 2023 года было аплачана за кошт сродкаў пасольства. Па словах старшыні ГКСЭ, квіткі на мерапрыемства каштавалі больш за 1600 еўра.

«Камісія ўстанавіла, што гэтае мерапрыемства насіла прыватны характар і афіцыйных сустрэч з прадстаўнікамі або лідарамі іншых краін не было. Гэта азначае, што такія мерапрыемствы неабходна аплачваць з асабістых сродкаў», — падкрэсліў Г. Сакалаускас. У сваю чаргу МЗС заяўляе аб намеры найбліжэйшым часам вывучыць рашэнне ГКСЭ і звязаныя з ім матэрыялы.

«Найбліжэйшым часам МЗС разгледзіць рашэнне і спадарожныя матэрыялы. Мы паважаем інстытут ГКСЭ і выстаўляем найвышэйшыя стандарты празрыстасці», — заявіла агенцтву Elta прэс-сакратарка міністра замежных спраў Паўліна Лявіцкіце.

• 8
• 0
• 1
• 3
• 3
• 0
• 3
• 0