Ці трэба заставацца дома, пакуль цалкам не знікнуць кашаль і насмарк? І калі чалавек з прастудай перастае быць заразным для калег? Пра гэта Tagesspiegel распытаў інфекцыяніста.
З надыходам халадоў пачынаецца сезон прастуды. Менавіта захворванні дыхальных шляхоў становяцца адной з галоўных прычын бальнічных. Пасля пандэміі каранавіруса людзі пачалі больш уважліва ставіцца да рызыкі заражэння. Многія цяпер застаюцца дома з кашлем і насмаркам, хоць раней з такімі сімптомамі спакойна хадзілі на працу.
Як даводзіць кіраўнік аддзялення інфекцыйных захворванняў універсітэцкай клінікі Фрайбурга Зігберт Рыг, нават без тэмпературы чалавек, які моцна кашляе і ў якога выдзяляецца шмат слізі, можа быць вельмі заразным. Такому лепш заставацца дома, у тым ліку з павагі да калег.
Звычайная прастуда найчасцей доўжыцца ад сямі да дзесяці дзён. Спачатку з'яўляюцца насмарк і боль у горле, прычым апошні звычайна найбольш моцны на трэці дзень. Прыкладна на чацвёрты дзень выдзяленні з носа дасягаюць максімуму, пасля чаго паступова змяншаюцца.
Галаўны боль і ламота ў целе могуць быць найбольш адчувальнымі на пяты дзень. Затым на першы план выходзіць сухі кашаль, які праз дзень-два становіцца больш вільготным. Пасля гэтага хвароба звычайна пачынае адступаць.
Колькі дзён трэба заставацца дома?
Нямецкі Інстытут Роберта Коха рэкамендуе пры вострых рэспіраторных інфекцыях заставацца дома ад трох да пяці дзён, пакуль самаадчуванне прыкметна не палепшыцца. Гэта не азначае, што праз тры дні ўсе аўтаматычна перастаюць быць заразнымі.
Паводле Рыга, калі насмарк і кашаль дасягаюць піку, арганізм звычайна выдзяляе найбольшую колькасць вірусаў. Пасля рызыка перадачы інфекцыі зніжаецца, нават калі нос усё яшчэ закладзены, а кашаль не прайшоў.
Рэч у тым, што дыхальныя шляхі працягваюць аднаўляцца пасля пашкоджання вірусам. Таму слабы сухі кашаль можа захоўвацца больш за тыдзень і сам па сабе не абавязкова сведчыць пра высокую заразнасць.
Калі чалавек ужо добра сябе адчувае, а з сімптомаў застаўся толькі нязначны кашаль, гэта не павінна аўтаматычна перашкаджаць вяртанню на працу. Аднак Рыг раіць пакуль насіць маску, трымаць дыстанцыю і рэгулярна мыць рукі, каб дадаткова зменшыць рызыку для навакольных.
Калі варта звярнуцца да доктара
Іншая сітуацыя, калі стан не паляпшаецца або пасля часовага паляпшэння зноў пагаршаецца. Асабліва насцярожыць павінны высокая тэмпература, моцная слабасць і праблемы з дыханнем. У такіх выпадках патрэбная кансультацыя доктара, бо да віруснай інфекцыі часам далучаецца бактэрыяльная.
Аднак жоўты або зялёны колер слізі сам па сабе не даказвае бактэрыяльную інфекцыю. Ён можа з'яўляцца і пры звычайнай віруснай прастудзе з-за працы клетак імуннай сістэмы. Таму аднаго колеру выдзяленняў недастаткова, каб вырашаць, ці патрэбныя антыбіётыкі.
Рыг нагадвае, што антыбіётыкі не дзейнічаюць на вірусы, а іх неабгрунтаванае выкарыстанне спрыяе развіццю ўстойлівасці бактэрый да лячэння. Пры падазрэнні на бактэрыяльнае ўскладненне рашэнне аб прызначэнні прэпаратаў павінен прымаць доктар.
Ці можна паскорыць выздараўленне
Паводле інфекцыяніста, большасць прастуд выклікаюць рынавірусы, але падобныя сімптомы могуць даваць каранавірусы, адэнавірусы і рэспіраторна-сінцытыяльны вірус (RSV). На ранніх стадыях адрозніць гэтыя інфекцыі толькі па самаадчуванні бывае цяжка.
Асобна стаіць грып. У адрозненне ад звычайнай прастуды, якая часта развіваецца паступова, грып звычайна пачынаецца раптоўна, з высокай тэмпературай, моцнай слабасцю, галаўным болем і ламотай у целе. Ён можа працякаць значна цяжэй.
Ад грыпу існуе вакцына. А прэпараты, якія прымаюць пры звычайнай прастудзе, толькі палягчаюць сімптомы, але не паскараюць выздараўленне. Так, пасцілкі могуць паменшыць боль у горле, цёплыя напоі дапамагаюць падтрымліваць вільготнасць слізістых абалонак, а назальныя спрэі на кароткі час палягчаюць дыханне. Аднак сродкамі для зняцця закладзенасці носа не варта карыстацца занадта доўга.
Галоўнай жа парадай інфекцыяніста застаецца адпачынак. Паводле Рыга, лепшае, што можна зрабіць падчас прастуды, — даць арганізму час і магчымасць аднавіцца.
Каментары