74-гадоваму пенсіянеру прызначылі 15 сутак арышту за лайкі ў «Аднакласніках» пад пастамі пра Ціханоўскую
Жыхара Мікашэвічаў Анатоля Прышчыка затрымалі 12 лютага. Паводле сваякоў, затрыманне было жорсткім: «з чорнага буса выскачылі 15 амбалаў са зброяй, кінулі 74-х гадовага дзядульку тварам аб зямлю».
Па інфармацыі берасцейскіх праваабаронцаў, 15 студзеня лунінецкая суддзя Вікторыя Жук прызначыла 15 сутак арышту Анатолю. Падставай сталі колішнія лайкі ў «Аднакласніках» пад інфармацыяй пра Святлану Ціханоўскую.
Сам Прышчык на судзе казаў, што не помніў пра тыя лайкі. І звяртаў увагу на свой стан здароўя. У 2022 годзе яму аперыравалі лёгкае — у яго выявілі анкалогію, ён мае праблемы з сэрцам.
Тым не менш, яго пакаралі па ч.2 арт.19.11 КаАП (распаўсюд экстрэмісцкіх матэрыялаў).
Анатоль Прышчык быў сябрам партыі БСДП (Грамада), неаднаразова зʼяўляўся назіральнікам на выбарах.
Каментары