Расійскія грамадзяне ўсё больш шкадуюць пра тое, што 24 лютага 2022 года іх войска на загад прэзідэнта Уладзіміра Пуціна ўварвалася ва Украіну, засведчыла апытанне, праведзенае сацыёлагамі RussianField.
Па стане на люты рэкордныя 38% грамадзян заявілі, што адмянілі б рашэнне аб пачатку «ваеннай аперацыі», калі б у іх была такая магчымасць. У параўнанні з сакавіком 2022 года колькасць такіх людзей павялічылася на 10 працэнтных пунктаў.
Доля тых, хто ўсё роўна павёў бы танкі і палкі ва Украіну, па-ранейшаму вышэйшая — 49%. Аднак «партыя вайны» сціскаецца: у сакавіку 2022 года «не сталі б адмяняць» рашэнне Пуціна 57%, падчас мабілізацыі доля такіх апусцілася да 51%, а цяпер упала ніжэй за палову.
Пераважная большасць апытаных лічаць, што тэрміны «ваеннай аперацыі» зацягнуліся (71%), піша RussianField: у асноўным гэта моладзь і малазабяспечаныя грамадзяне, прычым у гэтым меркаванні адзіныя як гледачы федэральнай ТБ-прапаганды (76%), так і чытачы тэлеграм-каналаў (67%).
У сакавіку 2022 года толькі 13% расейцаў лічылі, што вайна працягнецца больш за год. Цяпер, калі баявыя дзеянні перасягнулі трэцюю гадавіну, 44% мяркуюць, што і праз год спыніць праліццё крыві не атрымаецца.
Каментары