Затрыманую ў Варшаве на запыт Інтэрпала беларуску на радзіму не экстрадуюць
11 ліпеня варшаўская паліцыя паведаміла пра затрыманне грамадзянкі Беларусі на падставе «чырвонай ноты» Інтэрпала. На радзіме жанчыну абвінавачваюць у фінансавых махінацыях. Аднак экстрадаваць беларуску не будуць, паведамілі «Белсату» у Акруговай пракуратуры Варшавы і растлумачылі, чаму.
54-гадовую грамадзянку Беларусі затрымалі ў кватэры ў варшаўскім раёне Жалібаж. Жанчыну шукалі паводле «чырвонай ноты» Інтэрпала на запыт беларускіх сілавікоў. На радзіме жанчыну абвінавачваюць у фінансавых махінацыях.
Паведамлялася, што беларуску маюць экстрадаваць, аднак прэс-сакратар Акруговай пракуратуры Варшавы Пётр Антоні Скіба сказаў «Белсату», што гэтага не будзе. Ён растлумачыў, што ў Беларусі не гарантаванае выкананне законаў і справядлівы суд у дачыненні асобы, якую шукаюць на падставе «чырвонай ноты» Інтэрпалу. Пры гэтым існуюць сумневы ў дакладнасці інфармацыі, што беларускія ўлады перадаюць у Інтэрпал:
«У звязку з тым, што захаванне права на судовы кантроль за пазбаўленнем волі з'яўляецца фундаментальным прынцыпам, што дзейнічае ў прававой дзяржаве, экстрадыцыя ў краіну, якая гэтага прынцыпу не выконвае, недапушчальная».
Такім чынам, затрыманую ў Варшаве беларуску на радзіму не павязуць.
«Калі экстрадыцыі ў Беларусь няма, то бракуе падстаў для пазбаўлення асобы волі на тэрыторыі Рэспублікі Польшча, у тым ліку часовага арышту для забеспячэння працэдуры экстрадыцыі», — дадаў Скіба, адзначыўшы, што, калі беларус здзейсніць злачынства ў Польшчы, дэпартацыя непазбежная.
«У дачыненні асобаў, якія здзейснілі злачынствы на тэрыторыі Польшчы і маюць беларускае грамадзянства, у Памежную службу перадаюцца хадайніцтвы наконт дэпартацыі і накладання забароны на ўезд у Шэнгенскую зону», — заявіў прадстаўнік Акруговай пракуратуры Варшавы.
Цяперашнія ўлады Беларусі злоўжываюць магчымасцямі Інтэрполу дзеля затрымання палітычных апанентаў у свеце. Адзін з самых вядомых апошніх прыкладаў — гісторыя рэжысёра Андрэя Гнёта, якога затрымалі ў Сербіі на запыт арганізацыі і планавалі экстрадаваць на радзіму. Урэшце вялікімі высілкамі ўдалося дамагчыся ягонага вызвалення. Інтэрпал прызнаў, што справа Гнёта мае палітычную падкладку, і выкрасліў яго з «чырвонага спісу».
У Варшаве беларуску затрымалі на падставе запыту Інтэрпала
Лукашысты спрабуюць дабіцца выдачы ім беларусаў праз Інтэрпал, пазначаючы непалітычныя артыкулы
У Варшаве затрымалі беларуса, які знаходзіўся ў вышуку Інтэрпала
Стала вядома імя трэцяга чалавека, абвешчанага Інтэрпалам у вышук праз пасадку ў Мінску самалёта Ryanair
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал17
Каментары