Беларускім блогерам закручваюць гайкі — змянілі правілы публікацыі рэкламы ў сацсетках. Падрабязнасці

Парушальнікам можа стаць кожны, хто мае акаўнт у сацсетках

Згодна з новым законам «Аб рэкламе», які дзейнічае з 12 ліпеня 2024 года, размяшчаць рэкламу на інтэрнэт-сайтах і ў сацыяльных сетках могуць толькі тыя арганізацыі, ІП і фізічныя асобы, якія ўнесеныя ў дзяржаўны рэестр распаўсюджвальнікаў рэкламы.

Аказваць паслугі па размяшчэнні рэкламы ў інтэрнэце юрыдычнымі асобамі і ІП, не ўключаным у рэестр распаўсюджвальнікаў рэкламы, забараняецца. Такая дзейнасць будзе лічыцца незаконнай.

За размяшчэнне рэкламы без рэгістрацыі ў рэестры прадугледжаны штраф:

• для фізічных асоб — ад 20 да 50 базавых велічынь;
• для ІП — ад 20 да 200 базавых велічынь;
• для юрыдычнай асобы — да 500 базавых велічынь.

Апроч штрафаў, па артыкуле могуць канфіскаваць да 100% сумы даходу, атрыманага ў выніку такой дзейнасці.

Штраф за адзнакі і рэпосты?

З тлумачэнняў, якія дае Міністэрства антыманапольнага рэгулявання і гандлю, вынікае, што парушыць закон «Аб рэкламе» вельмі проста — дастаткова мець акаўнт у сацыяльных сетках.

Так, напрыклад, каб агляд нейкай установы ад блогера не палічылі за рэкламу, аўтару кантэнту неабходна выканаць шэраг патрабаванняў.

Па-першае, такі матэрыял мусіць быць выпушчаны па ініцыятыве блогера. Па-другое, публікацыі мусяць адпавядаць асноўнай тэматыцы блогера. То-бок, калі фудблогер вырашыць зрабіць агляд парка атракцыёнаў, а не чарговага кафэ, то да яго могуць узнікнуць пытанні. 

І самае галоўнае — у матэрыяле павінна адсутнічаць кантактная інфармацыя (адрас, нумар тэлефону, спасылка на сайт або акаўнты ў сацыяльных сетках).

Павялічыць

У іншых выпадках агляд будзе лічыцца рэкламай, а значыць, павінна быць складзеная дамова на аказанне паслуг.

Як апынуцца ў рэестры?

Заяўніку неабходна падаць апавяшчэнне ў Міністэрства антыманапольнага рэгулявання і гандлю.

Для гэтага неабходна спампаваць і запоўніць апавяшчэнне аб уключэнні звестак у рэестр. Апавяшчэнне трэба падаць у МАРГ у папяровым выглядзе. Яго павінны разгледзець цягам 5 працоўных дзён.

Звесткі пра рэкламараспаўсюджвальнікаў можна знайсці па спасылцы.

Навошта гэта ўладам?

Выглядае, што новы закон «Аб рэкламе» дазваляе, як той казаў, забіць адным стрэлам двух зайцаў. 

Прыраўняўшы амаль любыя згадкі пра месцы, тавары або паслугі ў сацыяльных сетках да рэкламы, заканатворцы фактычна пазбавілі блогераў хітрыкаў, каб ухіляцца ад аплаты падаткаў.

Цяпер немагчыма зрабіць паўнавартасна агляд, які не будзе лічыцца рэкламай, таму блогерам, каб не атрымаць штраф, давядзецца рабіць усё па законе.

Гэта значыць, што дзяржава атрымае больш грошай у выглядзе падаткаў. Прычым не толькі ад блогера, але і ад рэкламадаўцы. Бо ў Беларусі з 1 студзеня 2023 дзейнічае збор памерам 20%, які мусіць плаціць рэкламадаўца, калі размяшчае рэкламу не ў дзяржаўных медыя.

З іншага боку, дзяржава атрымлівае яшчэ большы інструмент ціску на блогераў, бо кожны будзе разумець, што праз расплыўчатасць фармулёвак прыцягнуць да адказнасці за парушэнне закона «Аб рэкламе» будзе проста. 

• 0
• 2
• 4
• 0
• 1
• 1
• 5
• 0