Як Байдэн прымаў рашэнне адмовіцца ад удзелу ў выбарах прэзідэнта ЗША. Хроніка выходных
Яшчэ ў суботу памочнікі прэзідэнта складалі графік мерапрыемстваў перадвыбарнай кампаніі, але да раніцы нядзелі Байдэн перадумаў.
![](http://nashaniva.com/img/w840d4webp1/photos/z_2024_07/biden_getty240722-b9n6z.jpg.webp)
Высокапастаўленыя супрацоўнікі Белага дома і перадвыбарчага штаба Джо Байдэна ўвесь мінулы тыдзень упарта настойвалі на тым, што прэзідэнт не збіраецца здымаць сваю кандыдатуру на выбарах 2024 года, нягледзячы на шматлікія заклікі ўплывовых дэмакратаў выйсці з гонкі, піша Бі-бі-сі.
Яшчэ ў суботу памочнікі прэзідэнта складалі графік мерапрыемстваў перадвыбарнай кампаніі, у якіх яму трэба было ўзяць удзел пасля вяртання ў Белы дом. Выходныя Байдэн, у якога зноў знайшлі кавід, правёў у сваім пляжным доміку на ўсходнім узбярэжжы штата Дэлавэр.
Аднак, як паведамілі блізкія да Байдэна ананімныя крыніцы, да раніцы нядзелі прэзідэнт перадумаў.
У суботу ўвечары Байдэн пачаў сур'ёзна думаць, ці не варта яму прыняць адно з самых складаных рашэнняў за ўсю яго 50-гадовую палітычную кар'еру і адмовіцца ад удзелу ў гонцы.
У працэсе ён размаўляў з невялікім колам памочнікаў, сярод якіх быў адзін з яго найбліжэйшых дарадцаў Стыў Рычэці, яго галоўны стратэг Майк Данілон, намеснік кіраўніка адміністрацыі Эні Тамасіні і Энтані Бернал — кіраўнік адміністрацыі першай лэдзі Джыл Байдэн.
Рычэці, які быў блізкім памочнікам Байдэна яшчэ з часоў яго працы ў Сенаце ЗША, прыехаў у пляжны домік прэзідэнта ў пятніцу. Данілон, яшчэ адзін памочнік, які адыграў ключавую ролю ў прыняцці самых важных палітычных рашэнняў прэзідэнта, далучыўся да іх у суботу. Байдэн і яго памочнікі вывучалі новыя звесткі апытанняў і абмяркоўвалі, ці зможа ён перамагчы Дональда Трампа ў існуючых умовах.
Новыя даныя аптымізму не выклікалі. Больш за тое, чакалася, што на гэтым тыдні да кампаніі за зняцце кандыдатуры Байдэна далучацца новыя фігуры ў Дэмакратычнай партыі. Прэзідэнту трэба было прыняць рашэнне.
Разам з Данілонам Байдэн пачаў складаць заяву аб выхадзе з гонкі. Рычэці ў гэты час прапрацоўваў падрабязнасці таго, як яна будзе распаўсюджвацца і як інфармаваць пра гэта іншых супрацоўнікаў апарата.
Паводле звестак крыніц Бі-бі-сі, Байдэн прыняў канчатковае рашэнне аб выхадзе з прэзідэнцкай гонкі ў нядзелю раніцай, асобна патэлефанаваўшы кіраўніку адміністрацыі Джэфу Зіентсу, кіраўніку сваёй перадвыбарнай кампаніі Джэн О'Мэлі Дылан і віцэ-прэзідэнту Камале Харыс, каб паведаміць ім пра гэта.
У нядзелю днём, у 13:45 па мясцовым часе (20:45 па Мінску), прэзідэнт правёў відэаканферэнцыю з самымі высокапастаўленымі супрацоўнікамі Белага дома і перадвыбарчага штаба, уключаючы Аніту Дан, якая кіруе камунікацыйнай стратэгіяй Белага дома. Праз хвіліну ён выступіў з публічнай заявай.
«Ён сказаў, што разважаў над гэтым апошнія некалькі дзён», — паведаміў высокапастаўлены супрацоўнік Белага дома.
Хоць у сваёй першапачатковай заяве Байдэн не згадаў Камалу Харыс у якасці патэнцыйнага кандыдата ў прэзідэнты, праз паўгадзіны ён напісаў у Х (былы твітар), што падтрымлівае яе кандыдатуру.
Па словах дзвюх крыніц, знаёмых з гэтымі размовамі, Байдэн і Харыс неаднаразова размаўлялі на працягу дня, яшчэ да таго, як прэзідэнт зрабіў сваю заяву.
Першая лэдзі Джыл Байдэн — найбліжэйшая дарадца прэзідэнта, чыё меркаванне, як лічыцца, было адным з вырашальных фактараў у яго рашэнні, — заявіла, што падтрымлівае жаданне мужа пакінуць прэзідэнцкую кампанію.
Пры гэтым многія ў Белым доме і ў перадвыбарным штабе не былі загадзя праінфармаваныя аб планах Байдэна. Большасць супрацоўнікаў даведаліся пра яго выхад з гонкі з паведамлення ў сацыяльных сетках.
Зіентс, кіраўнік апарата прэзідэнта, правёў нараду з чыноўнікамі Белага дома і разаслаў электронныя лісты ўсім супрацоўнікам адміністрацыі, каб пацвердзіць заяву Байдэна і падзякаваць ім за руплівую працу.
Як гаворыцца ў заяве Белага дома, Байдэн тым часам пагутарыў з некалькімі дэмакратамі ў Кангрэсе, губернатарамі і прыхільнікамі і плануе працягнуць абзвоньваць вядомых дэмакратаў у панядзелак.
Камала Харыс, якая ўжо заявіла, што плануе выйграць прэзідэнцкую намінацыю, правяла нядзельны дзень у тэлефонных перамовах з заканадаўцамі.
У тым ліку яна размаўляла з лідарам дэмакратычнай меншасці Палаты прадстаўнікоў Хакімам Джэфрысам і з ключавымі партыйнымі чыноўнікамі і губернатарамі, каб заручыцца іх падтрымкай на выбарах.
Хоць, на думку большасці аналітыкаў, сур'ёзных канкурэнтаў у Харыс няма, афіцыйна намінаваць яе павінен з'езд Дэмакратычнай партыі ў жніўні.
Байдэн выходзіць з прэзідэнцкай гонкі
«Надышоў час аб'яднацца і перамагчы Трампа». Байдэн падтрымаў кандыдатуру Камалы Харыс на выбарах
Хто такая Камала Харыс — кандыдатка ў прэзідэнты ЗША ад дэмакратаў замест Байдэна
Між тым у Байдэна нават галава не трэслася
Чаму Байдэн вырашыў выйсці з гонкі? Вось што пра гэта пішуць сусветныя медыя
Каментары