«Прэм'ер Галоўчанка такім не з'яўляецца, Вальфовіч таксама».
У новым выпуску ТОКу былы дыпламат і міністр культуры, а цяпер адзін з лідараў апазіцыі Павел Латушка патлумачыў, хто насамрэч знаходзіцца на вяршыні ўлады ў Беларусі.
На погляд Латушкі, вышэй за прэм'ер-міністра ў Беларусі раней быў кіраўнік Адміністрацыі Лукашэнкі:
«Кіраўнік Адміністрацыі быў той асобай, якая інфармавала прэм'ер-міністра аб тым, што ён будзе прызначаны альбо будзе звольнены з пасады. Хаця заўсёды па Канстытуцыі лічылася, што [другая асоба — гэта] прэм'ер-міністр».
Аднак сёння, адзначае былы высокі чыноўнік, нельга гаварыць аб тым, што Дзмітрый Круты, які займае пасаду кіраўніка Адміністрацыі, можа лічыцца другой асобай. Прычына — у яго асабістых якасцях.
«Круты не з'яўляецца той фігурай з пункту гледжання «царадворства», нейкіх практык, разумення сітуацыі. І ўплыву ў краіне ён не мае. Нават патэнцыялу такога не мае. Я яго ведаю асабіста. Ён не прырос за гэтую працу на пасадзе амбасадара ў Расіі. (…) Ён, дарэчы, прыўнёс гэты ўплыў расійскі.
Гэта той чалавек, які хутчэй выконвае ролю, выконвае заданні. Ён не мае свайго пункту гледжання і меркавання. Ён не Латыпаў, не Макей, калі [той] быў кіраўніком Адміністрацыі. Ён нават не Кабякоў, які пасля прэм'ерства стаў кіраўніком Адміністрацыі. Шэйман быў калісьці кіраўніком Адміністрацыі. Ён абсалютна саступае ўсім тым, хто быў да яго».
Самай моцнай асобай у адміністрацыі Лукашэнкі, на погляд Паўла Латушкі, з'яўляецца першая намесніца кіраўніка гэтай структуры Наталля Пяткевіч.
«Велічэзны досвед апаратнай працы, блізкасць да Лукашэнкі. Яна была першай памочніцай Лукашэнкі, была першай намесніцай кіраўніка [Адміністрацыі]. Гэта асоба, якая атрымала галоўную задачу — забяспечыць перапрызначэнне Лукашэнкі на ўзурпаваную ім пасаду прэзідэнта Беларусі. Калі яна выканае гэтую місію паспяхова, то яе вага сапраўды ўзрасце», — даводзіць Латушка і нагадвае, што падобную задачу ў 2010 годзе Пяткевіч не здолела выканаць.
Па словах Латушкі, багаты досвед дазваляе Пяткевіч быць вельмі ўплывовай асобай. Акрамя гэтага, у яе вялікія амбіцыі.
«Я цяжка сабе ўяўляю, як [міністр замежных спраў] Рыжанкоў з Пяткевіч сябруюць, як яны ўзгадняюць усё. Бо вельмі высокія амбіцыі ў Рыжанкова і вельмі высокія амбіцыі ў Пяткевіч. Але, можа, гэтае сяброўства, якое яны мелі з часоў студэнцтва, захоўвае нейкія правілы і дае магчымасць не канфліктаваць. Мы не чуем пра нейкія публічныя канфлікты.
Так што яна сёння фактычна ну не другая, але, напэўна, вельмі вядучая асоба ў краіне. Прэм'ер Галоўчанка такім не з'яўляецца. Хто ў нас сёння дзяржаўны сакратар Рады бяспекі? Вальфовіч. Той таксама [не ўплывовы]. Я думаю, зараз такая размытая сітуацыя. Няма вельмі ўплывовай асобы, як Мясніковіч быў ці Макей, ці Латыпаў», — даводзіць палітык.
Глядзіце цалкам:
У чым была супярэчлівасць Макея? Тлумачыць Латушка
Пяць фактаў пра Наталлю Пяткевіч — самую ўплывовую чыноўніцу Беларусі да з'яўлення Качанавай і Эйсмант
Астапеня: Адбываецца пэўная трансфармацыя рэжыму ў Беларусі
Лукашэнка не паверыў Рыжанкову. Пяткевіч выглядае процівагай Крутому. А Круты — вялікая загадка
Каментары