Апальны Цынь Ган, пра якога хадзілі чуткі, што яго маглі расстраляць ці ён мог сам забіць сябе, хутчэй за ўсё працуе ў пекінскім дзяржаўным выдавецтве на непрыкметнай пасадзе.
Міністр замежных спраў Кітая Цынь Ган нечакана знік пасля таго, як 25 чэрвеня 2023 года правёў сустрэчы ў Пекіне з міністрамі замежных спраў Шры-Ланкі і В'етнама, а таксама з намеснікам міністра замежных спраў Расіі Андрэем Рудэнкам.
Як піша The Washington Post, Цынь Ган зрабіў імклівую кар'еру. Разам прызначэннем міністрам замежных спраў ён быў уведзены ў склад Дзяржаўнай рады. Папярэднік Гана на пасадзе змог туды трапіць толькі праз пяць гадоў кіравання МЗС.
Цынь заслужыў давер Сі Цзіньпіна ў якасці кіраўніка службы пратаколу МЗС у 2014—2017 гадах. У гэтай ролі ён адказваў за драбнюткія дэталі іміджу Сі.
Выданне спасылаецца на ўспаміны былога беларускага дыпламата Паўла Слюнькіна, які пісаў аб тым, што падчас візіту кіраўніка Кітая ў Мінск у 2015 годзе вымушаны быў а другой гадзіне ночы пабудзіць намесніка дырэктара Музея гісторыі Вялікай Айчыннай вайны, каб ён пусціў туды кітайскіх дыпламатаў. Падымаючыся па ступеньках, яны лічылі іх і цікавіліся, на якую з іх ступіць нагой Сі, калі загучыць урачыстая музыка.
Цынь быў прызначаны намеснікам міністра замежных спраў у 2018 годзе, а потым паслом у Злучаных Штатах у 2021 годзе. На гэтай пасадзе ён прабыў 18 месяцаў і вярнуўся ў Пекін і стаў самым маладым міністрам замежных спраў Кітая з 1950-х гадоў. Аднак праз пару месяцаў пасля таго ён знік з поля зроку.
Да сёння дакладна невядома, што прывяло да знікнення Цыня. Найбольш распаўсюджанай была гісторыі пра яго раман з рэпарцёркай кітайскай тэлекампаніі Фу Сяоцянь, ад якой у яго нібыта нарадзіўся сын, які стаў грамадзянінам ЗША. Хадзілі пагалоскі, што Пекін падазрае жанчыну ў перадачы сакрэтных звестак замежнай разведцы, якія так і не пацвердзіліся. Аднак Фу, як і Цынь, ужо больш за год адсутнічаюць у грамадскім жыцці краіны.
У ліпені з'явілася паведамленне аб тым, што Цынь «выйшаў» са складу Цэнтральнага камітэта Камуністычнай партыі Кітая. На фоне інфармацыі аб звальненні некалькіх чыноўнікаў з складу ЦК, такая трактоўка дала падставы думаць, што экс-міністр жывы і можа быць прызначаны на іншую, ніжэйшую пасаду.
Цяпер, як сцвярджаюць двое былых амерыканскіх чыноўнікаў на ўмовах ананімнасці, Цынь Ган працуе (па меншай меры, лічыцца) у выдавецкім доме World Affairs Press, які звязаны з Міністэрствам замежных спраў Кітая.
Паніжэнне ў пасадзе, па словах крыніц выдання, «гэта няласка», але таксама і азначае, што Цынь «выкруціўся». «Яго не пасадзяць, але яго кар'еры кранты», — пракаментаваў выданню адзін з былых амерыканскіх чыноўнікаў.
Аднак журналістам так і не ўдалося пацвердзіць гэтую інфармацыю ні ў самім выдавецтве, ні ў яго кнігарні.
Каментары