Еўропа спяшаецца на дапамогу.
Дажджлівая вясна і пачатак лета не выратавалі Партугалію ад лясных пажараў — сезон пачаўся пазней, чым звычайна, але з падвоенай сілай. У панядзелак быў адкрыты рахунак чалавечым ахвярам, і іншыя краіны Еўропы адправіліся дапамагаць Партугаліі змагацца са стыхіяй. У аўторак сітуацыя не палепшылася, піша Бі-бі-сі.
У краіне бушуюць больш за 140 пажараў. Для іх тушэння задзейнічаны 19 самалётаў, верталётаў і дронаў, амаль 900 адзінак наземнай тэхнікі і каля 3000 чалавек.
Галоўныя ачагі — на поўначы і ў цэнтры краіны. У раёне Авейру палае асабліва моцна. З-за гэтых пажараў у панядзелак закрылі галоўную аўтадарогу паміж Порту і Лісабонам.
Паводле апошніх звестак уладаў, два чалавекі загінулі пры тушэнні, больш за дзясятак пацярпелі. З некалькіх вёсак эвакуявана насельніцтва.
Пажары не рэдкасць у Партугаліі і Іспаніі, аднак навукоўцы адзначаюць, што змяненне клімату робіць іх больш маштабнымі і непрадказальнымі.
Мінулае лета ў Еўропе выдалася самым гарачым у гісторыі, як і ў цэлым на планеце. Гэты год напэўна акажацца самым цёплым у гісторыі чалавецтва, што зробіць апошняе дзесяцігоддзе рэкордна гарачым за ўвесь час назіранняў і пацвердзіць тэндэнцыю маштабнага награвання планеты, у якім вінавата чалавецтва.
Змяненне клімату разгойдвае «арэлі» надвор'я, што прыводзіць да ўзмацнення маштабаў і частоты прыродных катаклізмаў. Пакуль у Партугаліі гараць лясы, Цэнтральную Еўропу затапляе.
Для дапамогі ў тушэнні пажараў Еўропа даслала Партугаліі 8 самалётаў.
«Мы тэрмінова мабілізуем 8 пажарных самалётаў, — паведаміла кіраўніца Еўракамісіі Урсула фон дэр Ляен. — Я дзякую Францыі, Грэцыі, Італіі і Іспаніі за тое, як хутка яны адгукнуліся. Вось яна, еўрапейская салідарнасць у яе лепшай праяве».
На найбліжэйшыя дні сіноптыкі абяцаюць Партугаліі захаванне гарачага і сухога надвор'я.
Пажары не сціхнуць, папярэдзілі ўлады краіны і ўвялі рэжым павышанай небяспекі на ўсёй тэрыторыі краіны да канца дня 19 верасня, «улічваючы прагноз надвор'я на бліжэйшыя некалькі дзён, які паказвае на значна ўзрастаючую рызыку лясных пажараў».
Цяпер чытаюць
Героя тэлефонных зліваў палкоўніка Кісяля, які заклікаў калечыць дэманстрантаў, раптоўна апусцілі на раённы ўзровень10
Каментары