У Мінску запрацавала сістэма аўтаматычнай фіксацыі праезду на чырвонае
Пілотны праект рэалізуюць на скрыжаванні вуліц Багдановіча і Шырокая ў сталіцы, паведаміў начальнік сталічнай ДАІ Сяргей Бабіч, піша Abw.by.
Ён распавёў, што «звесткі, якія атрымліваюцца з камеры відэаназірання, дазваляюць нават прыцягваць кіроўцаў-парушальнікаў да адказнасці (не ў аўтаматычным рэжыме, а на падставе агульных правілаў) згодна з КоАП».
«За апошні месяц мы выявілі каля 20 выпадкаў праезду на чырвонае святло на гэтым скрыжаванні. І кіроўцы, якія дапусцілі гэтыя парушэнні, прыцягнуты да адміністрацыйнай адказнасці», — праінфармаваў начальнік сталічнай ДАІ.
Сістэма працуе так: відэакамеры фіксуюць, які сігнал гарыць у момант уезду транспарту на скрыжаванне, у момант перасячэння стоп-лініі здымаюць дынаміку парушэння. Потым інфармацыя апрацоўваецца, і парушэнне фіксуецца ў аўтаматычным рэжыме.
Калі ж сістэма выйдзе з тэставага рэжыму і пачне працу на пастаяннай аснове, а таксама якія скрыжаванні будуць абсталяваны яшчэ? «Я ўпэўнены, што не пазней за наступны год сістэма пачне працу. Справа за малым: дапрацаваць працу і ўзаемадзеянне ўсіх сістэм», — сказаў Сяргей Бабіч.
Ён дадаў, што сістэма аўтаматычнай фіксацыі праезду на забараняльны сігнал святлафора будзе ўстанаўлівацца на скрыжаваннях, якія вызначаюцца павышанай аварыйнасцю: «У Мінску ўжо запланаваны каля пяці скрыжаванняў, якія патрабуюць першачарговай увагі».
Начальнік ДАІ прывёў такую статыстыку: у гэтым годзе ў Мінску адбылося 15 ДТЗ з-за праезду на чырвоны сігнал святлафора. У іх 16 чалавек былі траўмаваны.
Нядаўна паведамлялася, што на скрыжаванні вуліц Леніна і Піянерскай у Слуцку ўсталяваны комплекс фотафіксацыі парушэнняў ПДР, які працуе ў аўтаматычным рэжыме. Толькі за тыдзень сістэма зафіксавала больш за 200 кіроўцаў-парушальнікаў. Яны прыцягнуты да адміністрацыйнай адказнасці. Пра гэта паведамляла ДАІ Мінскай вобласці. Толькі за праезд на чырвоны сігнал святлафора пакаралі 40 кіроўцаў.
Як караюць за праезд на чырвонае святло
За праезд на забараняльны сігнал святлафора ў першы раз парушальніка могуць аштрафаваць на 1-5 базавых велічынь (ад 40 да 200 рублёў). Паўторна на працягу года штраф складзе ад 3 да дзесяці базавых велічынь (120-400 рублёў).
Таксама кіроўцу могуць прыцягнуць да адказнасці за стварэнне аварыйнай сітуацыі, за гэта прадугледжаны штраф у памеры ад 5 да 20 базавых велічынь (200−800 рублёў). Магчыма таксама пазбаўленне правоў на тэрмін да двух гадоў.
Ёсць і крымінальная адказнасць, якая можа наступіць, калі пацярпелыя атрымліваюць менш цяжкія і цяжкія цялесныя пашкоджанні.
Каментары