Лукашэнка падпісаў указ пра конкурсы прыгажосці. Паехаць на міжнародныя конкурсы можна будзе толькі з дазволу дзяржавы
Прычынай таму, верагодна, стаў нядаўні скандал вакол «Міс Сусвет». Што зменіцца для культурных, спартыўных і адукацыйных конкурсаў з 1 сакавіка 2025 года?
Аляксандр Лукашэнка сёння падпісаў указ «Аб прадстаўленні Рэспублікі Беларусь на міжнародных мерапрыемствах».
Згодна з дакументам,
з 1 сакавіка 2025 года выкарыстоўваць словы «Рэспубліка Беларусь», «Беларусь», «нацыянальны», «беларускі» ў назвах культурных, спартыўных і адукацыйных конкурсаў, дзе адбіраюць прадстаўніка ад Беларусі на міжнародныя мерапрыемствы, можна толькі ў тым выпадку, калі арганізатарам выступае дзяржаўная арганізацыя.
Нацыянальнай школе прыгажосці надалі статусам адзінага каардынатара па арганізацыі і правядзенні нацыянальнага конкурсу прыгажосці «Міс Беларусь», адбораў прадстаўнікоў краіны для ўдзелу ў міжнародных конкурсах прыгажосці.
Указ таксама вызначае парадак удзелу прадстаўнікоў Беларусі ў міжнародных культурных, спартыўных, адукацыйных мерапрыемствах, дзе прадстаўляць краіну можа толькі адна асоба ці каманда. Такі чалавек ці каманда могуць паехаць, калі прайшлі нацыянальны адбор, іх накіравала для ўдзелу дзяржаўная арганізацыя або яны паведамілі дзяржаўнаму органу пра намер удзельнічаць у такім мерапрыемстве.
Змены, выглядае, выкліканы нядаўнім скандалам вакол конкурсу «Міс Сусвет». «Наша Ніва» пісала, што на яго спачатку збіралася ехаць Карына Кісялёва, якая перамагла ў нацыянальным адборы, але ў выніку адправілася «Міс Беларусь 2023» Элеанора Качалоўская. А Кісялёва апынулася ў СІЗА. Інсайдары сцвярджаюць, што конкурс «Міс Сусвет Беларусь» сама Карына і арганізавала. Дзяўчына нібыта набыла ў арганізатараў сусветнага конкурсу ліцэнзію на ўдзел для Беларусі і правяла конкурс прыгажосці, у якім сама перамагла. Па словах знаёмых, мадэль вінавацяць у махлярстве.
Каментары