На прэзідэнцкіх выбарах у Харватыі ніводны з кандыдатаў не здолеў набраць больш за 50% галасоў
Дзейны кіраўнік дзяржавы Зоран Міланавіч атрымаў 49% галасоў. Яго асноўны канкурэнт, прадстаўнік кіроўнай кансерватыўнай партыі Драган Прыморац, набраў 19,35%. Зараз яны сустрэнуцца ў другім туры 12 студзеня, піша Радыё Свабода.
Іншыя кандыдаты, якіх на выбарах было восем, не змаглі набраць больш за 10% галасоў.
Харватыя — парламенцкая рэспубліка, дзе большасць ключавых рашэнняў прымае прэм’ер-міністр, у той час як прэзідэнт выконвае функцыю галоўнакамандуючага ўзброенымі сіламі.
Міланавіч вядомы сваёй крытыкай ваеннай дапамогі Украіне. У прыватнасці, ён забараніў навучанне ўкраінскіх вайскоўцаў на тэрыторыі Харватыі.
Прэм’ер-міністр Андрэй Пленкавіч называе яго «прарасійскім палітыкам» і сцвярджае, што Міланавіч «знішчае рэпутацыю Харватыі ў NATO і ЕС». У адказ на гэта прэзідэнт заяўляе, што імкнецца прадухіліць «удзел Харватыі ў непатрэбнай вайне» і што ва Украіне «супраць Расіі ваююць ЗША і NATO».
Драган Прыморац — педыятр, судовы эксперт, спецыяліст у галіне медыцынскай генетыкі і міністр навукі, адукацыі і спорту Харватыі ў 2003—2009 гадах.
На гэтых прэзідэнцкіх выбарах ён балатаваўся як незалежны кандыдат. Тым не менш, кансерватыўная партыя падтрымлівала яго кампанію, падчас якой Прыморац ускосна крытыкаваў папулізм Міланавіча.
Каментары