Лукашэнка назваў лаўрэатаў прэміі «За духоўнае адраджэнне». Сярод іх цэнтр Румо і БРСМ

Аляксандр Лукашэнка прысудзіў прэміі «За духоўнае адраджэнне» і спецыяльныя прэміі дзеячам культуры і мастацтва. Адпаведныя ўказы ён падпісаў 31 снежня, паведамляе БЕЛТА.

Прэміяй «За духоўнае адраджэнне» ўганараваны калектыў Мінскага навукова-практычнага цэнтра хірургіі, транспланталогіі і гематалогіі за выдатныя дасягненні ў паляпшэнні якасці медыцынскай дапамогі, развіццё навукі і папулярызацыю ідэй дабрачыннасці і міласэрнасці. Узначальвае гэты РНПЦ Алег Румо — член Савета Рэспублікі і давераная асоба Лукашэнкі на выбарах 2025 года. Ён быў даверанай асобай і падчас сфальшаваных выбараў 2020 года.

Прэмію таксама атрымаў калектыў Беларускага дзяржаўнага ўніверсітэта культуры і мастацтваў — за актыўную дзейнасць у патрыятычным выхаванні моладзі і рэалізацыю праекта «Лінія памяці. Код вайны».

Протаіерэй Алег Кунцэвіч, настаяцель прыхода храма Узвіжання Крыжа Гасподняга ў Мінску, удастоены высокай узнагароды за вялікі асабісты ўклад у справу духоўнага асветніцтва і патрыятычнае выхаванне, увекавечванне памяці аб загінулых у фашысцкім лагеры смерці для савецкіх ваеннапалонных «Шталаг 352».

За дасягненні ў галіне культуры прысуджаны восем спецыяльных прэмій дзеячам культуры і мастацтва.

Узнагарода знайшла калектывы:

Моладзевага тэатра эстрады — за значныя дасягненні ў галіне музычнага мастацтва, актыўны ўдзел у грамадска-культурным жыцці краіны;

Гомельскага дзіцячага сацыяльнага пансіяната «Шчаслівыя ўсмешкі» — за развіццё творчага патэнцыялу дзяцей і маладых людзей з інваліднасцю, інтэграцыю інклюзіўнага мастацтва ў культурную прастору краіны;

Мінскага дзяржаўнага каледжа мастацтваў — за плённую работу ў галіне навучання і выхавання творчай моладзі, актыўную грамадска-патрыятычную дзейнасць;

Мінскага дзяржаўнага палаца дзяцей і моладзі — за значныя дасягненні ў патрыятычным выхаванні падрастаючага пакалення, арганізацыю работы Поста №1 горада-героя Мінска па нясенні Ганаровай вахты памяці.

За ўнёсак у рэканструкцыю мемарыяльнага комплексу ў памяць аб вязнях Азарыцкага лагера смерці ў Калінкавіцкім раёне Гомельскай вобласці спецыяльнай прэміяй адзначаны аўтарскі калектыў у складзе начальніка бюро галоўных інжынераў праекта ААТ па комплексным праектаванні аб'ектаў жыллёва-сельскагаспадарчага прызначэння «Інстытут Гомельграмадзянпраект» Вольгі Ачапоўскай, загадчыцы навукова-асветніцкага аддзела Гомельскага абласнога музея воінскай славы Вікторыі Заяц і загадчыцы філіі «Мемарыяльны комплекс вязням Азарыцкага лагера смерці» Калінкавіцкага краязнаўчага музея Зінаіды Хлебавец.

За рэалізацыю міжнароднага маладзёжнага патрыятычнага праекта «Дарогамі памяці і славы» ўзнагароду здабылі Магілёўская абласная арганізацыя БРСМ, тэлерадыёкампанія «Магілёў» і Магілёўскі абласны краязнаўчы музей імя Я.Р. Раманава.

Спецыяльныя прэміі таксама прысуджаны загадчыцы аддзела традыцыйнай культуры Віцебскага абласнога метадычнага цэнтра народнай творчасці Таццяне Лапковай — за асабісты ўнёсак у захаванне і папулярызацыю тэхналогіі аплятання бяростай ганчарнай посуды і майстрыцы народных мастацкіх рамёстваў Гродненскага раённага культурна-інфармацыйнага цэнтра Ірыне Шавельскай — за значны ўнёсак у захаванне і папулярызацыю традыцыйных рамёстваў, адраджэнне народных тэхналогій пляцення саломы.

• 1
• 4
• 0
• 2
• 0
• 0
• 0
• 0