У Афганістане забаранілі ставіць вокны ў памяшканнях, якія выкарыстоўваюцца жанчынамі
Ісламісцкі рух «Талібан», які цяпер кіруе Афганістанам, забараніў ставіць вокны ў памяшканнях жылых дамоў, якімі звычайна карыстаюцца жанчыны. Да такіх месцаў адносяцца кухня, унутраны двор і іншыя бытавыя памяшканні.
Адпаведны загад вярхоўнага лідара талібаў апублікаваў у сацсетцы X прэс-сакратар урада Афганістана Забіхула Муджахід.
Улады краіны лічаць, што выгляд жанчын, якія працуюць на кухні ці набіраюць ваду з калодзежа, можа справакаваць мужчын на «непрыстойныя дзеянні».
Цяпер жыхарам краіны трэба будзе забіць вокны ў падобных месцах, а новыя жылыя дамы будуць будавацца з улікам паправак.
Ва ўказе сказана, што від на жанчын неабходна загароджваць, «каб пазбегнуць нязручнасцяў, якія прычыняюцца суседзям». Вокны можна размяшчаць толькі калі яны будуць на вышыні больш за чалавечы рост.
За апошні год талібы прынялі шэраг законаў, якія абмяжоўваюць правы жанчын. Сярод іх забарона на спевы, публічныя выступы, чытанне ўголас і размовы, у тым ліку адна з адной, забарона на выхад на двор з адкрытым тварам, забарона глядзець на мужчын і іншыя.
Каментары