Прэзідэнт ЗША заявіў, што падпісаў указ аб памілаванні Роса Ульбрыхта, які быў заснавальнікам гандлёвай пляцоўкі Silk Road («Шаўковы шлях») у даркнэце і асуджаны на два пажыццёвыя тэрміны, піша Бі-бі-сі.
У 2015 годзе суд Манхэтэна прызнаў яго вінаватым у распаўсюдзе наркотыкаў, удзеле ў злачыннай арганізацыі, адмыванні грошай, падробцы дакументаў і камп'ютарным узломе. На сайце Silk Road, які быў закрыты ў 2013 годзе пасля арышту Ульбрыхта, прадаваліся наркотыкі, падробленыя дакументы, хакерскае абсталяванне і іншыя забароненыя тавары.
Сайт быў даступны праз абароненую сетку Tor, а тавары можна было набыць за біткойны — у той час крыптавалюта толькі набірала папулярнасць, і Silk Road быў адным з нешматлікіх месцаў, дзе яе актыўна выкарыстоўвалі. Гэта таксама была адна з найбуйнейшых гандлёвых пляцовак у даркнэце, а абарот сайта, паводле даных амерыканскіх уладаў, складаў больш за 200 мільёнаў даляраў.
У сваёй сацыяльнай сетцы Truth Social Трамп напісаў, што патэлефанаваў маці Ульбрыхта і паведаміў ёй, што памілаваў сына.
«Ён атрымаў два пажыццёвыя тэрміны плюс 40 гадоў. Гэта недарэчна!» — заявіў Трамп. На судзе Ульбрыхт казаў, што стварыў сайт як эксперымент, перадаўшы пасля гэтага кіраванне іншым людзям, і не атрымліваў з гэтага прыбытку.
«Я хацеў даць людзям магчымасць рабіць выбар у сваім жыцці і мець канфідэнцыяльнасць і ананімнасць», — казаў ён на слуханнях.
Пасля вынясення вердыкту прысяжных Ульбрыхт звярнуўся да суддзі федэральнага суда Манхэтэна Кэтрын Форэст з просьбай не прызначаць пажыццёвы тэрмін.
«Я ведаю, што вы павінны забраць мае дарослыя гады, — казаў ён. — Але, калі ласка, пакіньце мне маю старасць».
Форэст засталася непахіснай і заявіла, агалошваючы прысуд, што Ульбрыхт «нічым не лепшы за любога іншага наркагандляра».
Трамп раней намякаў, што можа змякчыць прысуд Ульбрыхту пасля ўступлення на пасаду. За яго вызваленне выступала Лібертарыянская партыя, якая заяўляла, што справа Ульбрыхта з’яўляецца прыкладам злоўжывання ўладай.
-
Прэм'ер Літвы: Санкцыі супраць Расіі і Беларусі павінны быць хаця б рэгіянальнымі, нацыянальныя без толку
-
Гламурны космас. Джэф Безас адпраўляе сёння ў космас сваю нявесту і яшчэ пяць жанчын
-
Кыргызстан уручыў ноту пратэсту расійскаму паслу пасля аблавы і жорсткага збіцця сваіх грамадзян у маскоўскай лазні
Цяпер чытаюць
Хто такі Мацвей Бяляй, якога нібыта дэпартавалі ў Беларусь? Расказваем гісторыю дзіўнага актывіста з падазроным мінулым2
Каментары
Ніякага злому сыстэмы і распрыгоненьня не адбылося.
Што не перашкаджае радацца за Роса. Vir Fortis