Кароль Іарданіі Абдала II сёння наведаў Белы дом для сустрэчы з Дональдам Трампам. Раней прэзідэнт ЗША пагражаў спыніць падтрымку Егіпта і Іарданіі, калі яны не падтрымаюць ягоны план па рашэнні канфлікту ў сектары Газа — перасяленню палесцінцаў у іншыя арабскія краіны, дзе для іх створаць добрыя ўмовы. Выглядае, што гэтыя пагрозы маюць эфект.
Раней Абдала II асуджаў ідэю перасялення палесцінцаў, але пасля сустрэчы з кіраўніком ЗША змяніў рыторыку. Кароль Іарданіі паведаміў, што краіна прыме ў найбліжэйшы час 2000 дзяцей, якія знаходзяцца ў цяжкай сітуацыі ў сектары. Пасля гэтага ён правядзе перамовы з Егіптам і Саудаўскай Аравіяй, каб знайсці самае аптымальнае рашэнне, паважаючы інтарэсы гэтых краін і ЗША.
«Мы верым у тое, што можна дасягнуць міру і росквіту ў рэгіёне. Дзеля дасягнення гэтай мэты Іарданія падтрымае прэзідэнта ЗША Дональда Трампа», — заявіў Абдала ІІ.
«Я думаю, што ён будзе прымаць бежанцаў», — сказаў Трамп журналістам у Белым доме пасля сустрэчы.
Ён таксама заявіў, што перасяленне двух мільёнаў палесцінцаў з Газы — «нескладаная справа». Паводле яго, гэта нельга лічыць этнічнай чысткай, бо людзі будуць жыць ва ўмовах лепшых, чым сёння.
На пытанне журналіста, ці ідзе гаворка пра куплю сектара, Трамп заявіў: «Мы не купім Газу, мы проста яе забярэм».
Адказваючы на пытанне, ці адмовіць ён у дапамозе Іарданіі і Егіпту, калі тыя ўсё ж адмовяцца прымаць палесцінцаў з Газы, Трамп сказаў: «Так, можа быць, вядома, чаму б і не? … Калі яны не пагодзяцца, то я, магчыма, адмоўлю ім у (аказанні) дапамогі».
Іарданія ўжо сутыкнулася з наступствамі 90-дзённай паўзы ў наданні дапамогі, абвешчанай адміністрацыяй Трампа. Ізраіль і Егіпет атрымалі адтэрміноўку, але 1,45 мільярда даляраў, якія Іарданія атрымлівае ад ЗША кожны год, застаюцца замарожанымі датуль, пакуль адміністрацыя не перагледзіць усю замежную дапамогу.
У Іарданіі размешчаныя амерыканскія войскі і, у прыватнасці, авіяцыя. Яна з'яўляецца важным партнёрам Вашынгтона па абмене разведданымі, а мірная дамова паміж Іарданіяй і Ізраілем, падпісаная ў 1994 годзе, мае ключавое значэнне для рэгіянальнай стабільнасці.
Дональд Трамп абяцае, што ягоныя рашэнні нарэшце прынясуць у рэгіён мір, а палесцінцы змогуць жыць камфортна, без пагрозы новай вайны і гібелі. Учора Трамп таксама заклікаў ХАМАС вызваліць усіх закладнікаў да паўдня суботы, прыстрашыўшы рух баявымі дзеяннямі. Гэта стала адказам на заяву руху, які абвясціў, што прыпыняе вызваленне закладнікаў.
Сёння прэм'ер-міністр Біньямін Нетаньяху ў відэазвароце пасля чатырохгадзіннага пасяджэння Кабінета міністраў заявіў, што Ізраіль адновіць «інтэнсіўныя баі» ў сектары Газа, калі ХАМАС не выканае патрабаванне Трампа. Нетаньяху не ўдакладніў, колькі закладнікаў павінна быць вызвалена — згодна з першапачатковымі ўмовамі здзелкі, у гэтую суботу павінны быць вызваленыя трое ізраільцян.
На гэтым фоне Армія абароны Ізраіля заявіла, што дадаткова нарошчвае сілы ў раёне сектара. Вайскоўцы апісваюць узмацненне войскаў як «маштабнае» і кажуць, што яно ўключае прызыў рэзервістаў. Правыя ізраільскія палітыкі заклікаюць зладзіць «пекла» для ХАМАС і канчаткова знішчыць рух.
Тамара Віннікава прадала свой лонданскі дом, завешаны карцінамі самой сябе ШМАТ ФОТА23
Каментары