Чыноўнікам Еўрасаюза, якія адпраўляюцца ў ЗША, выдаюць аднаразовыя тэлефоны праз боязь шпіянажу
У Еўрасаюзе цяпер лічаць Злучаныя Штаты не менш варожай і небяспечнай краінай, чым Кітай. Забарона супрацоўнікам Еўракамісіі на паездку ў ЗША са звычайнымі працоўнымі смартфонамі і ноўтбукамі сведчыць пра тое, як моцна сапсаваліся стасункі паміж даўнімі саюзнікамі з прыходам да ўлады Дональда Трампа, піша Financial Times.
Еўрапейская камісія выдае супрацоўнікам, якія адпраўляюцца ў ЗША, аднаразовыя тэлефоны і простыя ноўтбукі, якія не змяшчаюць інфармацыі, каб пазбегнуць рызыкі шпіянажу.
Новыя інструкцыі атрымалі члены камісіі і высокапастаўленыя чыноўнікі, якія на наступным тыдні будуць удзельнічаць у вясновым саміце МВФ і Сусветнага банка ў Нью-Ёрку, расказалі Financial Times чатыры чалавекі, знаёмыя з сітуацыяй.
Паводле іх слоў, такія захады выкарыстоўваюцца пры паездках у Кітай або ва Украіну, дзе высокая рызыка сачэння з боку кітайскіх або расійскіх спецслужбаў.
«Яны непакояцца, што ЗША могуць пранікнуць у сістэмы Еўракамісіі», — сказаў адзін з суразмоўцаў. Пяты чыноўнік ЕС дадаў: «Трансатлантычнаму альянсу прыйшоў канец».
У Еўракамісіі пацвердзілі, што рэкамендацыі па бяспецы былі нядаўна абноўленыя, але адмовіліся даць больш падрабязную інфармацыю. Па словах чыноўнікаў, у інструкцыі для ўсіх супрацоўнікаў, якія адпраўляюцца ў ЗША, змяшчаецца рэкамендацыя выключаць тэлефоны на мяжы і змяшчаць іх у спецыяльныя чахлы, каб абараніць ад шпіянажу, калі яны застануцца без нагляду.
«Вашынгтон — гэта не Пекін і не Масква, але гэта праціўнік, які схільны выкарыстоўваць пазаправавыя метады, каб прасоўваць свае інтарэсы і садзейнічаць сваёй уладзе», — кажа Люк ван Мідэлар, дырэктар Брусэльскага інстытута геапалітыкі.
Памежнікі ў ЗША могуць праглядаць кантэнт на электронных прыладах, і ў апошнія тыдні было некалькі выпадкаў, калі турыстам або супрацоўнікам універсітэтаў і даследчых цэнтраў адмаўлялі ва ўездзе ў краіну з-за наяўнасці крытычных каментароў пра Дональда Трампа і яго адміністрацыі.
Таму супрацоўнікам Еўракамісіі нагадалі, каб іх візы былі ў дыпламатычных дакументах, а не ў нацыянальных пашпартах.
Сам Трамп у лютым заявіў:
«Давайце будзем сумленныя — Еўрапейскі Саюз быў створаны, каб надурыць Злучаныя Штаты. У гэтым была яго мэта, і яны добра з гэтым справіліся. Але цяпер я прэзідэнт».
Еўрапейскія кампаніі з-за палітыкі Трампа могуць вярнуцца да супрацоўніцтва з «Газпрамам»
Зяленскі заявіў, што Украіна гатова купіць 10 комплексаў Patriot за 15 мільярдаў долараў, але ЗША не прадаюць
Дуда: Трамп — гэта найлепшы шанец на мір ва Украіне
Пазняк кажа пра хуткія перамены ў Беларусі: Спадзяюся, я ў гэтым паўдзельнічаю
Прадстаўнік Трампа: Украіну можна падзяліць, як пасляваенны Берлін у межах мірнага пагаднення
Хто тая беларуска, якую экстрадавалі ў ЗША для суда за кантрабанду дэталяў для самалётаў8
Каментары