Заолаг стаў сведкам гібелі маладога мядзведзя на трасе Мінск — Віцебск
Заолаг учора стаў сведкам гібелі маладога мядзведзя на трасе М3 Мінск — Віцебск у Бярэзінскім біясферным запаведніку. Ён ехаў з хуткасцю 65 км/г, калі яго абагнаў аўтобус з Санкт-Пецярбургу, паведамляе тэлеграм-канал «Дзікая прырода побач».
«Аўтобус ехаў каля 75-80 км/г. Ён ад’ехаў ад мяне метраў на сто, і я гляджу — пасярод дарогі ляжыць мядзведзь. — расказвае Віталь. — Аўтобус спыніўся, выйшлі абодва вадзіцеля і пасажыры. Гэта вельмі ажыўленая траса, ззаду ехалі фуры. Я адцягнуў мядзведзя на абочыну, каб яго не давілі іншыя машыны. Потым я звязаўся з супрацоўнікам Бярэзінскага запаведніка, выклікаў ДАІ. Мне шкада і кіроўцу, і медзведзяня. Але ноччу, асабліва скрозь запаведнік, трэба ехаць асцярожней».
Па яго словах вінаваты кіроўца аўтобуса: на гэтым участку трасы стаіць знак «Пераход дзікіх звяроў на працягласці 25 кіламетраў», які абавязвае ехаць цішэй і асцярожней. За збітую чырванакніжную жывёлу пагражае сур’ёзны штраф.
Напярэдадні ў сацсетках з’явіліся паведамленні, што гадавое мядзведзяня бегае недалёка каля вёскі Бягомль — усяго за 15 км ад месца ДТЗ. Магчыма, гэта той самы звер.
Як пазбегчы падобных сітуацый?
- Старайся праз лес ездзіць толькі калі светла, пазбягай ездзіць у прыцемках і ноччу.
- У прыцемках і ноччу ў лесе ніколі не гані!
- Уключай у лесе дальняе святло заўсёды па магчымасці, як толькі наперадзе няма машын.
- Будзь асабліва ўважлівым на дарогах праз нацпаркі, запаведнікі і заказнікі.
- Будзь асцярожны на лясных трасах з агароджай па баках, бо яна не дае капытным пакінуць дарогу.
- Не сігналь і не міргай фарамі — паводзіны жывёлы могуць быць непрадказальныя.
Цяпер чытаюць
DDoS-атака ідзе на сайты адразу некалькіх беларускіх СМІ. Магчыма, яна звязаная з шостай гадавінай народнага ўздыму 2020‑га і канферэнцыяй «Новая Беларусь», што адкрылася сёння66
Каментары
Шкада жывёліну :(