У Магілёўскай вобласці міліцыя затрымала 24‑гадовую іншаземку, якую падазраюць у арганізацыі эскорт-агенцтва і ўдзеле ў схеме сэксуальнай эксплуатацыі людзей.
Супрацоўнікі ўпраўлення па супрацьдзеянні гандлю людзьмі УУС Магілёўскага аблвыканкама разам з калегамі з цэнтральнага апарату МУС спынілі спробу вывезці грамадзянку Беларусі за мяжу для сэксуальнай эксплуатацыі.
Паводле звестак сілавікоў, затрыманая была адной з арганізатараў анлайн-эскорт-агенцтва і дзейнічала ў тым ліку на тэрыторыі Беларусі. Яна завербавала 23‑гадовую жыхарку Магілёва, якой прапанавалі працу ў Заходняй Еўропе з высокім заробкам, добрымі ўмовамі пражывання і легальным працаўладкаваннем. Насамрэч дзяўчыну планавалі прымусіць займацца прастытуцыяй, аднак вывезці за мяжу не паспелі.
Падчас далейшай праверкі высветлілася, што затрыманая можа быць датычная і да іншых правапарушэнняў. Паводле версіі следства, яна ўцягвала замежных грамадзян у заняткі прастытуцыяй, а таксама прывозіла жанчын у Беларусь для працы ў згаданым эскорт-агенцтве.
Цяпер міліцыя высвятляе ўсіх удзельнікаў меркаванай злачыннай схемы, іх ролі і сувязі.
Следчыя распачалі крымінальную справу па факце арганізацыі і выкарыстання заняткаў прастытуцыяй. За гэтае злачынства заканадаўствам прадугледжана пакаранне аж да 10 гадоў пазбаўлення волі. У дачыненні да затрыманай праводзяцца следчыя дзеянні і вырашаецца пытанне аб абранні ёй меры стрымання.
Тым, хто плануе працаўладкавацца за мяжой, перад паездкай раяць старанна правяраць працадаўцу, умовы працы і законнасць прапанаванай вакансіі.
Каментары
эскорт, гэта ж ганаровая варта.