Каханне, здрада і мядовы месяц. Жанчыну ў Індыі арыштавалі за забойства мужа адразу пасля вяселля

Паліцыя Індыі заявіла, што жанчына, якая знікла пасля таго, як яе мужа жорстка забілі падчас іхняга мядовага месяца, знаходзіцца пад вартай — яна добраахвотна здалася паліцыі, піша Бі-бі-сі.

Спачатку сем’і пары сцвярджалі, што нявесту таксама або забілі, або выкралі, і пачалі маштабную кампанію па яе пошуку.

Цяпер жа паліцыя заяўляе, што 25-гадовая Сонем Рагхуваншы наймала забойцаў, каб пазбавіць жыцця свайго 30-гадовага мужа Раджу падчас іхняй паездкі ў маленькі паўночна-ўсходні штат Мегхалая. Чатырох мужчын таксама арыштавалі.

Бацька Сонем, Дэві Сінгх, абараняе дачку. Паводле яго слоў, «яна не вінаватая і не магла гэтага зрабіць».

Маладыя з горада Індор у цэнтральным штаце Мадх'я-Прадэш абралі Мегхалаю для свайго мядовага месяца, бо яны чулі, што там «вельмі прыгожыя даліны», распавёў брат Раджы Бі-бі-сі на выходных перад арыштам Сонем.

Пара ажанілася 11 мая ў Індоры, шлюб дабраславілі абедзве сям’і.

«Іх шлюб быў арганізаваны чатыры месяцы таму, і яны абодва былі шчаслівыя, паміж імі не было сварак ні да, ні пасля вяселля», — сказаў брат Раджы.

Пара выправілася ў Мегхалаю 20 мая. Але праз чатыры дні пасля пачатку паездкі яны зніклі.

Паліцыя і каманды па ліквідацыі наступстваў стыхійных бедстваў у суправаджэнні мясцовых жыхароў шукалі пару.

На відэа з месца падзей можна было ўбачыць ратавальнікаў, якія спускаліся па схілах і скалах у далінах, пакрытых туманам.

Улады паведамілі, што дождж і дрэнная бачнасць перашкаджалі пошукавым аперацыям.

Праз тыдзень цела Раджы, якое пачало раскладацца, знайшлі ў цясніне з перарэзаным горлам, пры гэтым яго кашалёк, залаты пярсцёнак і ланцужок зніклі. Сонем знікла без вестак.

Іх сем’і разгарнулі маштабную кампанію, абвінавачваючы паліцыю Мегхалаі ў недастатковай працы па раскрыцці забойства Раджы і пошуку Сонем — абвінавачанні, якія адмаўляў галоўны міністр штата.

Сем’і пары патрабавалі перадаць справу федэральнай паліцыі для належнага расследавання і сустракаліся з уплывовымі лідарамі каст і федэральнымі міністрамі ў сваім родным штаце, каб гэта прасунуць.

Мінулай пятніцы яны таксама напісалі ліст прэм’ер-міністру Нарэндры Модзі з просьбай пра справядлівасць для Раджы і пошук Сонем.

Але ў панядзелак раніцай генеральны дырэктар паліцыі Мегхалаі Ідашыша Нонгранг заявіў, што Сонем здалася ў адзін з аддзелаў паліцыі раёна Газіпур у штаце Утар-Прадэш.

Трох іншых падазраваных, таксама з роднага штата пары Мадх’я-Прадэш, арыштавалі падчас начных рэйдаў, паведаміў Нонгранг.

«Аднаго чалавека затрымалі ва Утар-Прадэшы, а яшчэ двух абвінавачаных — у Індоры. Сонем здалася ў аддзеле паліцыі Нандганж і была пазней арыштаваная», — паведаміў ён.

Пазней, выступаючы на прэс-канферэнцыі, начальнік паліцыі Вівек Сіем паведаміў, што чацвёртага мужчыну арыштавалі ў Мегхалаі ў панядзелак раніцай у сувязі са справай.

Ён не назваў матыў забойства Раджы, але ахарактарызаваў Сонем як «галоўную падазраваную».

У адказ на пытанне журналіста пра тое, «ці была Сонем у пазашлюбных адносінах з адным з затрыманых мужчын», спадар Сіем сказаў: «калі злучыць факты, то гэта так і выглядае». Але дадаў, што гэтыя дэталі можна будзе праверыць толькі пасля допыту абодвух.

Бацька Сонем, Дэві Сінгх, распавёў агенцтву ANI, што яго дачка мінулай ноччу дайшла да «прыдарожнага кафэ ў Газіпуры, дзе пазычыла мабільны тэлефон і патэлефанавала брату, які потым выклікаў паліцыю».

Сінгх дадаў, што не змог пагаварыць з дачкой, але верыць, што ёй «неяк удалося ўцячы ад сваіх выкрадальнікаў» і настойвае на яе невінаватасці.

Ён таксама абвінаваціў паліцыю Мегхалаі ў «выдумках» і звярнуўся да міністра ўнутраных спраў Аміта Шах з просьбай распачаць федэральнае расследаванне для ўсталявання праўды.

Брат Раджы, Віпін Рагхуваншы, спачатку сказаў журналістам, што «не паверыць ва ўдзел Сонем у забойстве, пакуль яна сама не прызнаецца».

Але пазней ён дадаў, што адзін з затрыманых мужчын, названы паліцыяй, працаваў у офісе Сонем.

«Толькі Сонем можа праясніць гэта, — сказаў ён. — Калі яна вінаватая, яе трэба пакараць».

Рагхуваншы, які неаднаразова крытыкаваў паліцыю і ўрад Мегхалаі за недастатковую працу па раскрыцці справы, таксама сказаў: «Цяпер я веру, што ўрад Мегхалаі не хлусіў. Яны казалі праўду».

У панядзелак раніцай, пасля таго як навіна з’явілася ў СМІ, галоўны міністр Мегхалаі Конрад Сангма пахваліў паліцыю штата, адзначыўшы, што яны дасягнулі «важнага прарыву» за сем дзён.

Іншы міністр, Александэр Лалу Гек, заявіў, што паліцыя, урад і нават звычайныя людзі штата падвяргаліся несправядлівым абвінавачванням падчас пошукаў.

«Праўда раскрылася», — сказаў ён.

• 0
• 1
• 2
• 2
• 0
• 0
• 0
• 0