«Радзіва Прудок», «Шэпт» і «Па што ідзеш воўча?» увосень пакажуць у Польшчы
Спектаклі пройдуць у Варшаве і Гданьску.
Фундацыя INEXKULT распачынае новы тэатральны сезон спектаклямі па беларускіх кніжных бестселерах. У Польшчы пакажуць пастаноўкі «Радзіва Прудок», «Шэпт» і «Па што ідзеш воўча?».
«Шэпт»
Гэта пастаноўка паводле аднайменнай кнігі Сяргея Лескеця. Спектакль прапаноўвае занурыцца ў таямнічы і, на жаль, сыходзячы свет беларускіх шаптух, якія цягам стагоддзяў лекавалі людзей зёлкамі, агнём, вадою і замовамі. Яны звярталіся да пракаветных багоў і да хрысціянскіх святых, мелі ўласныя рытуалы ды рэцэпты выкаранення хваробы і маглі сагрэць адным словам. Беларускі фатограф і этнограф Сяргей Лескець больш за дзевяць гадоў занатоўваў свае сустрэчы з такімі бабулямі (а пераважна, шаптухамі былі жанчыны) на фотастужку ды дыктафон і назбіраў не толькі самі замовы, але і сведчанні тагачаснага жыцця, цеплыні і вясковай пяшчоты да людзей.
Святлана Анікей, Дзмітрый Лук’янчык і Міхаіл Зуй ствараюць тэатральную замову з галасоў знахарак, музыкі і мінімалістычнай сцэнаграфіі, дзе шэпт — гэта чырвоная нітка, што знітоўвае гледачоў не толькі адзін з адным, але і з сапраўднай беларускай спадчынай.
Калі: 28 верасня, нядзеля, 19:00
Дзе: Гданьск, Gdański Teatr Szekspirowski
Квіткі можна набыць тут.
Калі: 2 кастрычніка, чацвер, 19:00
Дзе: Варшава, Terminal Kultury Gocław
Квіткі можна набыць тут.
«Па што ідзеш, воўча?»
Спектакль паводле аднайменнага бестселера Евы Вежнавец. Галоўная гераіня — Рына — мае каля 40 гадоў і прагу да алкаголю, а цяпер вяртаецца з нямецкага Дармштадту ў беларускую глыбінку, каб пахаваць старую бабулю, згадаць сваё жыццё і знайсці, прынамсі, свае карані. А, мо, і нешта большае, бо Беларусь — гэта край, дзе можна пражыць у адной вёсцы ўсё жыццё, але змяніць некалькі краін, яшчэ больш уладароў і назапасіць такі досвед, нібыта гэта ты пражыў жыццё 102-гадовай бабулі ды яшчэ і сваё.
Шматмоўны эксперымент, жаночая гісторыя, пераплеценая з гісторыяй усёй Усходняй Еўропы, гіперрэалізм і абсурд як часткі паўсядзённага жыцця — усё гэта ўвасобілася ў спектаклю, дзе сумесь жудаснага і кранальнага нікога не пакіне абыякавым. У спектаклі задзейнічаныя Яўгенія Кульбачная, Вольга Грыгораш, Святлана Зелянкоўская і Моніка Давідзюк.
У 2021 годзе аповесць Евы Вежнавец «Па што ідзеш, воўча?» атрымала літаратурную прэмію імя Ежы Гедройця за найлепшую кнігу. Сёння яна перакладзеная на шэсць моў, а аднайменны спектакль з поспехам прайшоў у Варшаве, Беластоку і французскім Авіньёне падчас сёлетняга міжнароднага тэатральнага фестывалю.
Калі: 26 кастрычніка, нядзеля, 19:00
Дзе: Гданьск, Gdański Teatr Szekspirowski
Квіткі можна набыць тут.
Для жыхароў Гданьска ёсць спецыяльная прапанова купіць квіткі адразу на два спектаклі танней («Шэпт» і «Па што ідзеш, воўча?») — набыць можна тут.
«Радзіва Прудок»
Культавае падарожжа ў беларускі вясковы космас па кніжным бестселеры Андруся Горвата. Некалі аўтар працаваў дворнікам у Купалаўскім тэатры, а потым змяніў Мінск на палескі Прудок. З дзённіку вясковых замалёвак паўстала кніга, а потым і спектакль, якія адпраўляюць беларусаў у сусвет вясковага жыцця, водар палыну ды дзядоўскіх ігруш, зорнае неба і бездань настальгіі па няўлоўным, але вельмі дарагім мінулым. Адчуць сябе часткай гэтага чароўнага сусвету дапамагаюць неймаверныя Святлана Анікей, Міхась Зуй і Зміцер Есяневіч.
Калі: 3 лютага, аўторак, 19:00
Дзе: Варшава, Terminal Kultury Gocław
Квіткі можна набыць тут. Да канца 2025 года можна ўзяць квіток на «Радзіва Прудок» са зніжкай 25% па прамакодзе INEX2025.
Цяпер чытаюць
Як выглядае стылёвы дом новай рэктаркі Акадэміі мастацтваў коштам паўмільёна даляраў19
Як выглядае стылёвы дом новай рэктаркі Акадэміі мастацтваў коштам паўмільёна даляраў
Пагражаў вайскоўцам раскрыць, хто з іх гомасэксуал, каб выпытаць сакрэты і прадаць Украіне. Вось за што адыёзны функцыянер БРСМ атрымаў 17 гадоў калоніі1212
Каментары