У Брэсце пажарныя машыны паліваюць возера вадой. Гэта вельмі важная місія
Пажарнікаў прыцягнулі да ратавання прыроды.
У Брэсце пажарныя машыны паліваюць вадой возера Вычулкі. Аказваецца, такім чынам яны ратуюць рыбу, якая жыве ў вадаёме.
Мясцовыя рыбаловы не так даўно паведамілі, што ў возеры пачаўся замор рыбы. Адносна прычын мясцовыя жыхары спрачаюцца. Той-сёй мяркуе, што вінаватыя жыхары прыватных дамоў паблізу, якія незаконна зліваюць у возера розныя адкіды.
Так ці інакш, гарадскія службы вырашылі змагацца з заморам рыбы. Для гэтага ратавальнікі праводзяць аэрацыю возера, гэта значыць насычаюць яго кіслародам, прапускаючы моцную струю вады.
Дапамагаюць ратавальнікам камунальнікі і спецыялісты прыродааховы. Спецыялісты будуць сачыць за станам вады да стабілізацыі сітуацыі. Па словах эколагаў, аэрацыя вельмі актуальная для гарадскіх азёр, дзе нагрузка на прыроду вышэйшая, чым у натуральных вадаёмах.
Спецыялісты кажуць, што аэрацыя не толькі ратуе рыбу, але і станоўча ўплывае на агульны стан вадаёма: памяншаецца верагоднасць цвіцення вады, паляпшаецца яе празрыстасць, што важна для ўсёй экасістэмы.
Каментары