30 гадоў таму мінчук забіў былога мужа сваёй жонкі, але справу раскрылі толькі цяпер
Следчыя раскрылі рэзананснае злачынства, учыненае ў сталіцы яшчэ ў сакавіку 1995 года. Тады ў пад'ездзе жылога дома на вуліцы Палявой знайшлі цела 43‑гадовага мужчыны з перарэзаным горлам і цяжкімі траўмамі галавы, паведамляе СК.
На месцы здарэння заўважылі незвычайную дэталь — не цалкам укручаную лямпачку над ліфтам, на якой захаваліся адбіткі пальцаў. Менавіта гэты след праз гады дапамог выйсці на падазраванага.
Следства адпрацоўвала розныя версіі, у тым ліку рабаванне. Аднак гэтая версія хутка адпала — грошы, дакументы і асабістыя рэчы ахвяры засталіся пры ім. Правяраліся таксама магчымыя сувязі загінулага з раней судзімымі за гвалтоўныя злачынствы і ўважліва вывучалася яго кола зносін. Адсутнасць сведкаў і канкрэтных доказаў доўгія гады заводзіла расследаванне ў тупік.
Загінулы жыў разам з былой жонкай і сынам. Жанчына распавядала, што муж злоўжываў спіртным, быў агрэсіўны і часта правакаваў канфлікты. Пазней стала вядома, што да забойства мог быць датычны яе новы каханы — калега па працы. Менавіта яго адбіткі пальцаў былі на той самай лямпачцы. У 2008 годзе мужчыну выклікалі на допыт, аднак ён патлумачыў, што ў 1995 годзе проста мяняў яе па просьбе сваёй цяперашняй жонкі — і мог пакінуць след.
Прасоўванне ў справе адбылося толькі ў 2025 годзе дзякуючы сучасным крыміналістычным тэхналогіям. Эксперты ўстанавілі: адбіткі на лямпачцы з’явіліся менавіта ў ноч забойства, што абвергла ранейшыя тлумачэнні падазраванага.
Мужчына прызнаўся, што доўгі час спачуваў жанчыне, у якую быў закаханы дзесяць гадоў, з-за яе складаных адносін з былым мужам, і ў рэшце рэшт вырашыў «вызваліць яе ад мучыцеля».
Вечарам 22 сакавіка 1995 года ён падпільнаваў ахвяру каля пад’езда, распыліў у твар газ з пярцовага балончыка, некалькі разоў ударыў малатком па галаве, а потым перарэзаў горла небяспечнай брытвай.
Далей падазраванага ахапіла паніка: па яго словах, ён хацеў, каб у пад’ездзе стала цёмна — таму выкруціў лямпачку. Пасля гэтага пайшоў на працу — дзеля алібі.
Зараз 66‑гадоваму мінчуку выстаўлена абвінавачанне ў забойстве, здзейсненым з асаблівай жорсткасцю. Па рашэнні суда ён змешчаны пад варту. Мужчыну можа чакаць да 25 гадоў, пажыццёвае зняволенне, або нават смяротнае пакаранне.
Цяпер чытаюць
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу11
«Я стаў шчаслівы». Праца на будоўлі прыносіць добрыя грошы, а грамадская актыўнасць — маральную сілу. Былы каліновец Кусь расказаў пра тое, як вярнуў унутраную раўнавагу
«Галандскі архітэктар», які адбудаваў Вострую браму і паставіў сабе дом-крэпасць у Гайцюнішках, аказаўся ніякім не галандцам. Але яго спадчына захапляе1010
Каментары
Што там адбіткі. Цэлыя джыпы, бывае, то зьяўляюцца, каб мяжу прарваць, то пасьля зьнікаюць.