Падчас атакі Расіі над захадам Украіны лёталі кітайскія спадарожнікі, якія лічаць разведвальнымі
Разам з тым невядома, ці праводзілі гэтыя спадарожнікі фактычную разведку падчас пралётаў над Украінай.
У ноч на 5 кастрычніка Расія запусціла па Украіне больш за 50 ракет і каля 500 ударных дронаў. Падчас гэтага над заходняй часткай Украіны праляцела мінімум тры кітайскія разведвальныя SAR-спадарожнікі, паведамляе партал «Мілітарний» (на аснове аналізу звестак маніторынгавага сэрвісу Heavens Above, які адсочвае перамяшчэнне спадарожнікаў).
Над Львовам быў зафіксаваны пралёт спадарожнікаў серыі Yaogan 33 (Yaogan 33, Yaogan 33‑03 і Yaogan 33-04), якія праляцелі ўсяго 9 разоў над рэгіёнам з 00:00 да прыкладна 11:30 раніцы.
Пазней, прыкладна ў 6 раніцы, у рэгіён увайшоў аптычны разведвальны спадарожнік Yaogan 34. Ён здзейсніў 7 віткоў над рэгіёнам на працягу 5 кастрычніка.
Спадарожнікі гэтай серыі размяшчаюцца на нізкіх арбітах на вышыні каля 700 кіламетраў. Гэта дазваляе ім рабіць поўны абарот вакол планеты прыкладна кожныя 90 хвілін.
Дакладнай інфармацыі пра магчымасці спадарожнікаў Yaogan 33 няшмат. Паводле афіцыйнай кітайскай пазіцыі, спадарожнікі гэтага тыпу выкарыстоўваюцца для навуковых эксперыментаў, даследаванняў зямельных рэсурсаў, а таксама прадухілення стыхійных бедстваў. Аднак лічыцца, што насамрэч гэта ваенныя разведвальныя спадарожнікі, якія абсталяваны радарам з сінтэзаванай апертурай (SAR), падобна спадарожнікам ICEYE.
Спадарожнікі Yaogan 33 былі запушчаны ў 2022—2023 гадах і прыйшлі на замену разведвальным спадарожнікам SAR першага пакалення Yaogan-1, якія запускаліся пачынаючы з 2006 года.
Разам з тым невядома, ці праводзілі гэтыя спадарожнікі фактычную разведку падчас пралётаў над Украінай.
Цяпер чытаюць
Памятаеце Асоль Слівец? Жыццё фрыстайлісткі змянілася да непазнавальнасці, цяпер яна Абігаль3
Каментары