Святлана Ціханоўская ў «Студыі Белсат» пракаментавала тое, што як муж Сяргей Ціханоўскі цяпер у Злучаных Штатах разам з дзецьмі, і адказала на чуткі, што ягоны ад’езд нібыта быў звязаны з жаданнем не перашкаджаць яе палітычнай працы.
Паводле Святланы Ціханоўскай, такая версія не адпавядае рэчаіснасці. Яна адзначыла, што Сяргей Ціханоўскі сапраўды планаваў паехаць у ЗША, каб вывучаць ангельскую мову і больш працаваць з беларускай дыяспарай. Канчатковае рашэнне аб тым, што дзеці паедуць разам з ім, было прынятае з улікам сямейных абставін.
«Я была ў падвешаным стане: ці заставацца, ці пераязджаць з Вільні, бо дзеці хадзілі ў школу, і вырываць іх з навучальнага працэсу было складана. Сяргей прапанаваў, што дзеці часова пабудуць з ім. Больш за тое, ён не бачыў іх пяць гадоў. Ён хацеў зноў прывыкнуць да дзяцей, наладзіць з імі стасункі», — сказала яна.
Дэмакратычная лідарка дадала, што ўдзячная мужу за такое рашэнне, бо інакш пераезды былі б значна цяжэйшымі, асабліва з дзецьмі. Паводле яе, яны размаўляюць кожны вечар, а яна працягвае дапамагаць дзецям з вучобай.
Таксама Ціханоўская вярнулася да сваіх слоў 2020 года, калі падчас збору подпісаў за ейную кандыдатуру яна заяўляла, што людзі ідуць не да яе, а да Сяргея Ціханоўскага як лідара. Яна кажа, што за мінулыя пяць гадоў набыла ўласны досвед, аднак яе пазіцыя адносна ролі мужа не змянілася.
«Сяргей застаецца лідарам. Ён для мяне той чалавек, які адкрыў Новую Беларусь, адкрыў пачуцці, якіх я не адчувала да таго, як ён з’явіўся на экранах. Для мяне ён вялікі герой — таксама, як Марыя Калеснікава і Віктар Бабарыка», — адзначыла яна.
Паводле Ціханоўскай, людзі пасля турмы могуць быць разгубленымі і вяртацца да логікі 2020 года, дапускаючы памылкі, аднак «усё можна зразумець і заўсёды трэба даваць другі шанец».
«Цяпер так склаліся абставіны, што ён не можа быць побач. Але ён застаецца тым самым Сяргеем Ціханоўскім, які запаліў агонь у сэрцах людзей. І ён яшчэ сваё слова скажа», — адзначыла Святлана Ціханоўская.
Цяпер чытаюць
Колькасць судоў па палітычных крыміналках зменшылася ў разы24
Каментары