Фантастычны вынік ва ўласным садзе атрымаў Роберт Пялінак, жыхар аграгарадка Русіна. Пенсіянер вырасціў небывалы ўраджай груш: 25 штук на 25‑сантыметровай галінцы, паведамляе выданне «Наш край».
Роберт Іосіфавіч родам з Віцебшчыны, аднак Баранавіцкі раён для яго стаў родным — больш за 50 гадоў ён жыве ў Русіне. Да пенсіі быў каморнікам.
Калі часу стала больш, пачаў эксперыментаваць у сваім садзе. Прышчапляць расліны навучыўся даўно: жывучы ў сельскай мясцовасці, кажа гаспадар, не трэба спецыяльных ведаў.
— Была ў мяне старая груша, пачала яна паміраць. Аднак дала парасткі, іх я не выдаліў, вырашыў прышчапіць, — распавядае садоўнік-аматар. — Прышчапляў галінкі з іншых груш у маім садзе, а тую самую папрасіў у знаёмага. Вясной, калі пладовыя дрэвы цвілі, ударыў мароз, аднак тую самую галінку ён не зачапіў.
— Квецені на ёй было багата — цэлы букет! Потым кожная кветачка ператварылася ў завязь, — працягвае расповед Роберт Іосіфавіч. — Палову мы выдалілі, бо разумелі, што столькі пладоў на такой невялікай галінцы — сантыметраў 25 — проста не зможа саспець.
Потым грушы пачалі павялічвацца ў памерах, і тады гаспадар вырашыў захаваць ураджай незвычайным спосабам — змясціў плады ў сетку для поўнага і раўнамернага паспявання. Каб галінка не зламалася, паставіў падпорку.
Рэкордны ўраджай цяпер знялі: ён даспявае і набірае сок. Вага самай вялікай грушы — 325 грамаў. Трохсотграмовых экземпляраў — працэнтаў 30.
Цяпер чытаюць
«Паездкай мы задаволеныя, але сівых валасоў дадалося». Жыхарка Светлагорска адпачыла ў Геленджыку і дзеліцца эмоцыямі13
«Паездкай мы задаволеныя, але сівых валасоў дадалося». Жыхарка Светлагорска адпачыла ў Геленджыку і дзеліцца эмоцыямі
У Беларусі зацвердзілі правілы эвакуацыі каштоўнасцяў на выпадак вайны: цэглу з Брэсцкай крэпасці з надпісамі будуць ратаваць перш за карціны Шагала і Суціна1515
Каментары