Нарвегія можа стаць гарантам еўрапейскага крэдыту Украіне, вылучыўшы на гэта частку свайго Суверэннага фонду
Нарвегія можа выкарыстаць частку свайго гіганцкага нацыянальнага фонду для забеспячэння вялікага еўрапейскага крэдыту Украіне. Гэта можа зняць перашкоды для выкарыстання замарожаных расійскіх грошай.
Нарвегія абмяркоўвае прапанову, якая дазволіць Еўрапейскаму саюзу прыцягнуць крэдыт для Украіны ў памеры больш за 100 мільярдаў еўра. Асновай для забеспячэння гэтага доўгу можа стаць частка нарвежскага нацыянальнага Суверэннага фонду дабрабыту, найбуйнейшага ў свеце — ён складае €1,7 трыльёна, піша The Times.
Кіеў адчайна мае патрэбу ў фінансаванні. Кіраўніцтва ЕС раней распрацавала план пазычыць140 мільярдаў еўра пад замарожаныя расійскія дзяржаўныя актывы. Аднак гэтая схема сутыкнулася з пазіцыяй Бельгіі. Менавіта ў Бруселі знаходзіцца міжнародны дэпазітарый Euroclear, дзе захоўваецца значная частка сродкаў. Бельгія асцерагаецца наступстваў і патрабуе ад краін ЕС падзяліць з ёю палітычныя і фінансавыя рызыкі.
Каб ЕС мог прыцягнуць такую буйную пазыку, неабходна істотнае забеспячэнне на выпадак, калі Украіна будзе не ў стане пагасіць гэтыя сродкі.
Ідэя выкарыстаць Нарвежскі суверэнны фонд дабрабыту ў якасці гаранта набыла папулярнасць пасля таго, як Данія і іншыя еўрапейскія партнёры выказалі меркаванне, што Нарвегія, якая не ўваходзіць у ЕС, «нажываецца на вайне», прадаючы вялікія аб'ёмы нафты і газу, але аказвае адносна невялікую дапамогу.
Нарвежскія эканамісты Хавард Халанд і Кнут Антон Морк прапанавалі, каб краіна кампенсавала гэта, прадаставіўшы частку свайго фонду ў якасці гарантыі.
Ідэя знайшла падтрымку ў нарвежскім парламенце, дзе яе ўхвалілі ўжо чатыры з дзевяці палітычных партый.
Прэм'ер-міністр Нарвегіі Ёнас Гар Сторэ заявіў, што ён адкрыты для гэтай прапановы і даручыў падрыхтаваць адпаведны аналіз. Аднак ён адзначыў, што чакае вызначанага сігналу аб зацікаўленасці з боку ЕС.
«Гэтыя дыскусіі ў ЕС яшчэ не завершаны, таму я не буду казаць нічога больш, акрамя таго, што мы знаходзімся ў цесным кантакце з імі», — сказаў Сторэ.
Беларускія рэпетытары ў паніцы: праз праблемы «Яндэкса» яны могуць страціць матэрыялы, якія напрацоўвалі гадамі27
Каментары
Норвеги не для этого собирали
Поставьте себя на их место
Ничего личного