Турыстам давядзецца плаціць па два еўра, каб падысці да знакамітага рымскага фантана Трэві
Такім чынам гарадскія ўлады спадзяюцца знізіць хаатычныя турыстычныя патокі.
Турысты ў Рыме неўзабаве будуць абавязаныя плаціць уваходны збор два еўра, калі захочуць убачыць знакаміты фантан Трэві зблізку. Такім чынам гарадскія ўлады спадзяюцца ў тым ліку знізіць «хаатычныя турыстычныя патокі», піша Бі-бі-сі.
Новае абмежаванне для наведвальнікаў, якія жадаюць паглядзець на помнік у стылі барока, набудзе моц з 1 лютага 2026 года.
Сабраныя сродкі будуць паступаць у гарадскі бюджэт для аплаты выдаткаў на ўтрыманне фантана і абслугоўванне наведвальнікаў. Горад разлічвае атрымліваць каля 6,5 мільёна еўра ў год толькі за кошт платы за наведванне фантана.
Абвяшчаючы пра гэтае рашэнне ў пятніцу, мэр Рыма Раберта Гуальцьеры, як паведаміла агенцтва Reuters, адзначыў, што «два еўра — гэта не так ужо і шмат… і гэта прывядзе да менш хаатычных турыстычных патокаў».
Збор за наведванне фантана Трэві з’яўляецца часткай новай тарыфнай сістэмы для некаторых музеяў і помнікаў у сталіцы Італіі.
Доступ да шэрагу аб’ектаў, за якія цяпер спаганяецца ўваходная плата, стане бясплатным для жыхароў Рыма.
У той жа час турысты і асобы, якія не з’яўляюцца рэзідэнтамі Італіі, павінны будуць плаціць за агляд фантана Трэві і яшчэ пяці славутасцяў, у тым ліку музея Напалеона.
Дзеці да пяці гадоў, а таксама людзі з інваліднасцю і асоба, якая іх суправаджае, будуць вызваленыя ад платы за наведванне славутасцяў. Турысты па-ранейшаму змогуць бясплатна глядзець на фантан Трэві, пабудаваны італьянскім архітэктарам Нікола Сальві ў XVIII стагоддзі, — але з адлегласці.
Паводле даных мэрыі Рыма, цяпер гэты аб’ект у сярэднім наведваюць каля 30 тысяч чалавек у дзень.
Пасля рэстаўрацыйных работ, праведзеных летась, Гуальцьеры ўвёў сістэму чэргаў, каб прадухіліць скапленне вялікіх натоўпаў каля славутасці.
Цяпер адначасова вакол фантана могуць знаходзіцца не больш за 400 чалавек.
Каментары
Вас там яшчэ і абкрадуць 🎄
Всю жизнь вход туда был бесплатный.
Совсем уже…