Канфіскацыя маёмасці ў сваякоў, паліграф і раздача кантрольных хабараў — у пракуратуры тры новыя ідэі для барацьбы з карупцыяй

Генеральная пракуратура прапануе змены ў заканадаўства, каб змагацца з карупцыяй больш эфектыўна. Гэтыя ідэі абмяркоўвалі на чарговай рэспубліканскай каардынацыйнай нарадзе аб барацьбе са злачыннасцю і карупцыяй.

Яны сфармуляваныя ў артыкуле «Актуальныя праблемы супрацьдзеяння карупцыі і некаторыя прапановы для іх рашэння» пад аўтарствам старшага пракурора ўпраўлення Генеральнай пракуратуры Андрэя Фядорычава, апублікаваным у свежым нумары часопіса «Законнасць і правапарадак» (№4, 2025).

Першая задума — прадугледзіць канфіскацыю маёмасці, законнасць паходжання якой не пацверджаная, не толькі ва ўсіх катэгорый службовых асобаў, але ў іх сваякоў.

У якасці прыкладу падаецца гісторыя намесніка гендырэктара акцыянернага таварыства (незразумела, дзяржаўнага ці прыватнага). За кошт хабараў ён атрымаў злачынны даход мінімум на 936 тысяч рублёў. Аднак у яго знайшлі маёмасць на 1,4 мільёна рублёў і двухузроўневую кватэру ў Мінску. Пракуратура спадзявалася канфіскаваць гэту маёмасць — бо незразумела, адкуль у яго магло быць столькі ўсяго. Але нічога не атрымалася.

Па-першае, сваякі арыштаванага добраахвотна заплацілі суму злачыннага даходу. Адкуль узялі такія гіганцкія грошы — невядома. Па-другое, намеснік гендырэктара фармальна не займаў «адказную пасаду», таму некаторыя артыкулы закона «Аб барацьбе з карупцыяй» на яго не распаўсюджваліся.

Наступная ідэя — правяраць на паліграфе кандыдатаў на кіроўныя пасады.

«Выкарыстанне паліграфа шырока распаўсюдзілася і паказала сваю эфектыўнасць пры падборы кадраў у сілавых структурах, недзяржаўных арганізацыях і банкаўскай сферы, — гаворыцца ў артыкуле. — Таму прапанавана прапрацаваць пытанне псіхалагічнага даследавання асобы кандыдатаў перад прызначэннем на кіроўныя пасады ў дзяржаўным сектары эканомікі».

Трэцяя задума — прапаноўваць чыноўнікам кантрольныя хабары.

Гэта называецца прыгожа — выкарыстанне папераджальна-прафілактычнага метаду. З санкцыі пракурора чыноўнікаў будуць правяраць — прапаноўваць хабары. Не ўсім, а тым, у дачыненні да якіх маюцца звесткі аб датычнасці да карупцыі.

Аўтар артыкула запэўнівае, што гэта не тое самае, што правакацыя на атрыманне хабару. Маўляў, калі чыноўнік павядзецца, то яго проста назаўсёды выганяць з дзяржаўнай службы, затое не пасадзяць.

Ідэі абмяркоўвалі яшчэ ў той час, калі генеральным пракурорам быў Андрэй Швед. Невядома, ці будзе яго наступнік такім жа прыхільнікам узмацнення жорсткасці заканадаўства.

• 1
• 0
• 8
• 3
• 0
• 0
• 1
• 0