У Беларусі з’явіўся новы соус, які вонкава нагадвае маянэз, але выраблены без выкарыстання інгрэдыентаў жывёльнага паходжання. Мінскі вытворца, добра вядомы сваімі маянэзамі, пачаў продаж прадукту пад гандлёвай маркай «Залатая кропля», піша Telegraf.news.
Новы соус з назвай «Веган» цалкам складаецца з раслінных кампанентаў. На Мінскім маргарынавым заводзе адзначаюць, што ён разлічаны на людзей, якія прытрымліваюцца здаровага ладу жыцця, трымаюць пост, а таксама на веганаў і вегетарыянцаў.
Асноўнымі асаблівасцямі навінкі з’яўляюцца нізкая каларыйнасць, адсутнасць жывёльных тлушчаў, выкарыстанне гарохавага бялку як каштоўнай крыніцы расліннага пратэіну і адсутнасць кансервантаў. Поўны склад пакуль недаступны, бо соус яшчэ не з’явіўся на афіцыйным сайце вытворцы.
Падобныя гарохавыя соусы не з’яўляюцца ўнікальнай распрацоўкай беларускіх тэхнолагаў. У розных краінах яны выкарыстоўваюцца даўно. Напрыклад, у Вялікабрытаніі папулярны гарнір да fish and chips — густое зялёнае пюрэ з сушанага гароху з мятай і лімонным сокам. У Індыі ж гарох часта дадаюць у вострыя соусы на аснове таматаў, цыбулі, кэш’ю або какосавага малака, якія могуць быць як дадаткам, так і самастойнымі стравамі.
Раней Мінскі маргарынавы завод ужо здзіўляў пакупнікоў незвычайнымі навінкамі: у лінейцы соусаў «Залатая кропля» з’явіўся маянэз далікатна-ружовага колеру, што нетыпова для класічнага прадукту.
Цяпер чытаюць
Чаму амерыканцы так ірвуцца на Месяц, што там будуць здабываць? І што да таго беларусам? Тлумачыць беларускі астрафізік1
Каментары