У Столінскім раёне жыхар вёскі Манькавічы разам з дзвюма дочкамі зляпіў гіганцкага снегавіка. Яго вышыня перавышае 4 метры. Колькі часу спатрэбілася на такую працу, Леанід Філановіч расказаў БелТА.
Для вяскоўца гэта ўжо не першы досвед лепкі вялікага снегавіка. Сёлета выпала больш снегу, і Леанід вырашыў зрабіць скульптуру яшчэ большай.
«Бяруся заўсёды, калі снег лепіцца, калі цёпла. Гляджу прагноз надвор’я, каб наперадзе былі маразы. Не хочацца, каб ён хутка растаў, бо праца вялікая. Цяжка ляпіць, шмат снегу трэба», — патлумачыў мужчына.
Бацька і дзве яго дачкі, Мілана і Ліяна, узяліся за справу прыкладна а дзявятай гадзіне вечара 27 студзеня.
Калі дзяўчынкі пайшлі адпачываць, мужчына працягнуў працаваць самастойна і скончыў бліжэй да чацвёртай гадзіны раніцы 28 студзеня.
«Першы шар атрымаўся каля 2 метраў. Плюс яшчэ два шары зверху. Недзе 4,5 метра будзе снегавік, — меркаваў жыхар Манькавіч. — Колькі мог каціць шар, каціў. Пакінуў яго на тым месцы, дзе вырашыў паставіць снегавіка. Потым яшчэ шары зрабіў, злучыў іх, акругліў. Для апошняга па лесвіцы насіў снежныя шары і злучаў іх наверсе».
Па словах Леаніда, у той момант ён, як у дзяцінстве, адчуваў радасць. За суткі гіганцкі снегавік прыцягнуў да сябе павышаную ўвагу. Вестка пра яго разляцелася далёка за межы Манькавіч.
«У мінулыя гады я рабіў снегавікоў у сваім агародзе. Людзі прасілі зайсці, каб паглядзець, сфатаграфавацца. У гэты раз вырашыў зляпіць яго на вуліцы, каб ніхто не саромеўся і ўсе жадаючыя маглі фатаграфавацца», — сказаў мужчына.
Гэта яшчэ не канчатковы варыянт: Леанід плануе дапрацаваць рысы твару снежнага велікана.
Цяпер чытаюць
Былога супрацоўніка контрразведкі КДБ арыштавалі за здраду дзяржаве9
Каментары
Так, канчатковы апісаны у "Мяцелі" Сарокіна.