Люксавы італьянскі брэнд Miu Miu выпусціў калекцыю, якую параўналі з халатамі з ЦУМа
«Зараз у беларускім ГУМе і ЦУМе ўсе запасы такіх заляжалых халатаў выкупяць».
Італьянскі люксавы брэнд Miu Miu яшчэ ў кастрычніку прэзентаваў новую калекцыю сезона вясна-лета 2026. Але цяпер яна працягнула ўвагу беларускіх модніц.
Стваральнікі калекцыі імкнуліся звярнуць увагу на важнасць працы жанчыны. Дызайнерка Міуча Прада прэзентавала свае разважанні пра выклікі, з якімі сутыкаюцца жанчыны ў сваёй кар'еры, пераадоленне цяжкасцяў і нябачнасць жаночай працы.
Цэнтральным элементам калекцыі стаў фартух. Па задуме аўтараў, гэты прадмет адзення можа быць адначасова ўтылітарным і дэкаратыўным, а яго культурныя сэнсы радыкальна змяняюцца ў залежнасці ад формы і матэрыялаў.
Міуча Прада натхнялася архіўнымі здымкамі вядомых фатографаў-дакументалістаў мінулага стагоддзя — Даратэі Ланж (1895-1965) і Хельгі Парыс (1938-2024).
«У вобразах суседнічаюць матэрыялы, якія звычайна лічацца несумяшчальнымі: грубы рабочы твід, цяжкая скура і неапрацаванае палатно спалучаюцца з далікатнымі карункамі, шаўковым клаке (від рэльеф'нага матэрыялу. — НН) і вытанчаным паплінам.
Абутак і сумкі з трывалай скуры ўвасабляюць ідэю «індустрыяльнай прыгажосці», дзе практычнасць становіцца эстэтыкай. Нават фальбаны — традыцыйны знак жаноцкасці — набываюць тут новую ролю: яны становяцца інструментам трансфармацыі, ствараючы далікатны баланс паміж суровасцю і пяшчотай»,
тлумачыць закладзеныя сэнсы брэнд.
Аднак пакуль на сусветных подыумах асэнсоўваюць філасофію працоўных будняў, беларускі і іншыя жанчыны з краін СНД убачылі у высокай модзе нешта надта знаёмае. Для многіх «інтэлектуальны маніфест» Міучы Прада аказаўся копіяй асартыменту адпаведнага аддзела ўнівермага.
«Паказ MIU MIU summer 2026 — гэта мы з аднакласніцамі ідзём паказваць хлопчыкам, што пашылі з хэбэшачкі ў 5 класе…» — заўважыла адна з карыстальніц Threads.
Іншыя пагаджаюцца: «Ой, і праўда, выраб «фартух».
Шмат хто ў шоку, што фота калекцыі сапраўдныя, а не створаныя штучным інтэлектам:
«Госпадзі, я нават палезла на сайт MIU MIU правяраць, што гэта не ШІ. І гэта не ШІ».
«Такое адчуванне, што, калі гуру сусветнай моды не могуць знайсці натхненне, яны пачынаюць гартаць савецкія часопісы «Работніца», «Сялянка»…» — дзяляцца сваімі ўражаннямі жанчыны.
Іншыя жартам прагназуюць ажыятаж у сталічных універмагах:
«Зараз у беларускім ГУМе і ЦУМе ўсе запасы такіх заляжалых халатаў выкупяць».
Згадваюць і старыя савецкія жарты:
— У вас сітчык вясёленькі ёсць?
— Прыходзьце, абхахочацеся.
Многія жартуюць, што нарэшце старыя бабуліны рэчы можна падаць як апошні піск моды:
«Дастаць бабуліны фартухі — і быць самымі моднымі. І спытаць, ці не заваляліся ў яе дробныя бігудзі для прычоскі».
«Вось і спатрэбіўся халацік з бабулінага куфра».
«У мяне ў шафе парачка такіх ляжыць. Нарэшце дачакаліся свайго часу!»
Нехта бачыць у гэтым падтэкст:
«Выглядае як сцёб з краін СССР».
«Цяпер паліэстар для бедных, а хэбэшачка для багатых», — рэзюміруе адна з жанчын.
Сустрэчу Рыжанкова з Сікорскім папрасіў Мінск. Што каманда Ціханоўскай абмяркоўвала з палякамі да і пасля яе11
Каментары