З’явіліся спадарожнікавыя здымкі з наступствамі ўдару ракет па бранскім заводзе мікраэлектронікі — ён разбураны
Аналіз свежых спадарожнікавых здымкаў пацвердзіў крытычныя пашкоджанні аднаго з найбуйнейшых прадпрыемстваў расійскага ВПК — бранскага завода «Крэмній Эл».
На спадарожнікавых здымках, апублікаваных CyberBoroshno, бачныя наступствы пяці траплянняў па галоўным вытворчым цэху, нанесеных крылатымі ракетамі Storm Shadow.
Характар разбурэнняў сведчыць, што аднаўленне працы без поўнай і працяглай рэканструкцыі практычна немагчымае. Фактычна гэта азначае вывядзенне стратэгічнага аб’екта з эксплуатацыі на нявызначаны тэрмін.
Расійскія ваенкары пішуць, што над Бранскам падчас атакі на «Крэмній Эл» віселі ўкраінскія беспілотнікі, якія ажыццяўлялі аб’ектыўны кантроль.
Завод «Крэмній Эл» з’яўляецца ключавым пастаўшчыком мікраэлектронікі для расійскай арміі: тут вырабляюць дэталі для сістэм СПА «Панцыр», ракетных комплексаў «Іскандэр» і іншай высокадакладнай зброі.
У выніку атакі УСУ, паводле звестак губернатара Бранскай вобласці, загінулі шэсць мірных жыхароў. Яшчэ 42 чалавекі параненыя.
Каментары