Вялікая сума наяўных грошай, паўтысячы патронаў. Што вядома пра справу затрыманага ў Харкаве беларуса-добраахвотніка

Аляксандр Красоўскі ваяваў спачатку ў палку імя Кастуся Каліноўскага, а потым — у падраздзяленні «Тур» у складзе 225‑га асобнага штурмавога батальёна.

Красоўскі мае вышэйшую адукацыю, разам з жонкай выхоўваюць дачку, якая мае другую групу інваліднасці. Радыё Свабода высветліла некаторыя дэталі яго справы.

Справу расследуюць са студзеня

Справу, якую расследуе адзін з аддзелаў Харкаўскай абласной паліцыі, завялі сёлета 21 студзеня, а затрымалі беларуса толькі праз амаль два месяцы. Увесь гэты час — ад узбуджэння справы да затрымання — за ім вялі таемныя следчыя дзеянні.

Ураджэнца Мінска падазраюць у самавольным пакіданні вайсковай часткі (згодна з ч. 5 артыкула 407 караецца пазбаўленнем волі на тэрмін ад 5 да 10 гадоў), і ў нашэнні, захоўванні, набыцці, перадачы і збыце без прадугледжанага законам дазволу зброі і баявых прыпасаў (згодна з ч. 1 артыкула 263 караецца пазбаўленнем волі на тэрмін ад трох да сямі гадоў).

Ці было самавольнае пакіданне часткі

Як паведаміла Свабодзе крыніца, знаёмая з часткай матэрыялаў справы, беларус не прызнае, што без паважных прычын не вярнуўся на службу.

Ён адзначыў, што яшчэ ў жніўні 2025 года паведаміў камандзіру пра намер звольніцца, але той яму адмовіў. У выніку Аляксандр Красоўскі ў кастрычніку 2025 года ўзяў штогадовы адпачынак і напісаў рапарт на імя камандзіра сухапутных войскаў аб звальненні.

З 30 кастрычніка да 7 лістапада ён праходзіў медыцынскі агляд, а потым нібыта і атрымаў загад аб звальненні, таму і не вярнуўся ў распараджэнне вайсковай часткі.

У вайсковай частцы пацвердзілі, што Аляксандр Красоўскі сапраўды на падставе загаду камандзіра вайсковай часткі з 25 кастрычніка 2025 года ўзяў адпачынак да 10 лістапада. Беларус паведаміў, што тады ж здаў усю маёмасць і пасаду камандзіру. Але праз чатыры дні той адклікаў свой загад «з-за абвастрэння баявой сітуацыі», на падставе якога беларус павінен быў вярнуцца ў вайсковую частку да 30 кастрычніка. Гэтага Аляксандр не зрабіў, і ў вайсковай частцы пачалі службовае расследаванне.

Калі вырашалася пытанне аб арышце беларуса, суд абапіраўся на інфармацыю, атрыманую менавіта з вайсковай часткі.

Што знайшлі падчас вобшукаў

Вобшук праводзілі 14 сакавіка. У арандаваным будынку знайшлі 680 тысяч еўра ў купюрах па 50 і 100 еўра, 518 патронаў рознага калібру, два запалы для ручной гранаты і тры гранаты.

Аляксандр Красоўскі заявіў, што грошы прызначаліся для набыцця цягачоў, аўтамабіляў і іншай тэхнікі для іншай брыгады, у якую ён планаваў ісці служыць пасля звальнення з папярэдняй вайсковай часткі, а боепрыпасы належаць не яму, а іншаму вайскоўцу.

Суразмоўнік Свабоды сапраўды пацвердзіў, што па гэтым эпізодзе правяраецца яшчэ адзін украінскі вайсковец.

Дарэчы, суд першапачаткова адмовіў следству ў арышце ўсіх знойдзеных падчас вобшуку рэчаў — як грошай, так і боепрыпасаў, паколькі ў адпаведным пазове следчага не было пазначана месца іх захавання. Суд даў 72 гадзіны на выпраўленне памылак, але пакуль дакладна не ўдалося высветліць, ці звярталіся следчыя з новым адпаведным хадайніцтвам.

Цяпер беларускага добраахвотніка ўтрымліваюць у Харкаўскім следчым ізалятары. Там ён будзе знаходзіцца сама менш да 12 траўня. Пры неабходнасці следчыя бліжэй да гэтай даты могуць звярнуцца па падаўжэнне тэрміну ўтрымання яго пад вартай.

• 3
• 0
• 0
• 5
• 3
• 1
• 4
• 0