Беларуску расчаравалі сыркі «Топ Crispy» з фундуком — у іх не знайшлося фундуку
Вольга пажалілася ў Threads на беларускія сыркі пад брэндам «Топ» ад «Савушкаў прадукт». У сырках не аказалася заяўленага на ўпакоўцы інгрэдыенту, піша «Блізка».
Дзяўчыну не задаволіла тое, што ў сырку «Топ Crispy» з фундуком у глазуры і карамеллю ў глазуры не знайшлося фундуку — «проста глазура з дзіркамі». Вольга прыклала не толькі ўласныя фотадоказы, але і адказ ад брэнда «Савушкаў прадукт» — тыя тлумачылі, што рэцэптура і прапорцыі строга кантралююцца, але магчыма ў працэсе вымешвання нешта пайшло не так і ў адных порцыях арэхаў аказалася больш, чым у іншых.
Аднак у каментарыях карыстальнікі не пагадзіліся з меркаваннем вытворцы:
- «Больш за месяц купляю іх. Арэхаў ніколі не было».
- «Трэба пралабіяваць закон як у Японіі, каб знешні выгляд на ўпакоўцы адпавядаў таму, што ўнутры».
Карэспандэнты вырашылі праверыць самі: купілі два сыркі «Топ Crispy» за 1,02 рубля ў «Еўраопце» з фундуком і карамеллю і з какосам.
У складзе пазначаны інгрэдыенты ў глазурнай пасыпцы: абсмажаныя ядры фундуку і какосавая стружка. Яны ж былі намаляваны на пярэднім баку ўпакоўкі побач з яркім надпісам пра іх наяўнасць.
Сырок з фундуком і карамеллю заяўленых чаканняў не апраўдаў — арэхаў у глазуры практычна не было. Нават іх смак не адчуваўся ў працэсе дэгустацыі.
У какосавага сырка справы ішлі лепш — пасыпкі было няшмат, але значна больш, чым фундуку.
Каментары