Расія і Украіна абмяняліся ўдарамі па энергааб’ектах пасля слоў Трампа пра энергетычнае перамір’е
Расія і Украіна абмяняліся ўдарамі па энергааб'ектах пасля слоў Трампа пра энергетычнае перамір'е.

Украіна раніцай у аўторак атакавала нафтаперапрацоўчы завод у Самарскай вобласці, а расійскі дрон трапіў па аўтазапраўцы ў Кіеве. Атакі адбыліся праз некалькі гадзін пасля заявы прэзідэнта ЗША Дональда Трампа пра тое, што Масква і Кіеў нібыта дамовіліся не наносіць удары па энергетычных аб'ектах адзін аднаго, звяртае ўвагу «Агенцтва».
Украінскія беспілотнікі пашкодзілі адно з прамысловых прадпрыемстваў Самарскай вобласці, паведаміў губернатар рэгіёна Вячаслаў Фядорышчаў. Украінскія маніторынгавыя тэлеграм-каналы апублікавалі фота і відэа, на якіх, як сцвярджаецца, бачныя пажары на атакаваным НПЗ у Сызрані.

Сызранскі НПЗ, паводле даных «Раснафты», штогод перапрацоўвае 6,1 млн тон нафты. Пры гэтым прадпрыемства выпускае 2,1 млн тон дызельнага паліва, што азначае, што без увагі засталася і нядзельная заява Трампа, які заклікаў Кіеў спыніць удары па вытворчасці дызельнага паліва ў Расіі.
У Расіі, акрамя Сызранскага НПЗ, быў атакаваны склад Ozon у Таганрозе.
Расія ў ноч на аўторак нанесла ўдары па Харкаўскай вобласці і Кіеве. У сталіцы Украіны, паводле паведамлення мэра Віталя Клічкі, зафіксавана траплянне беспілотніка па аўтамабільнай запраўцы.
У панядзелак прэзідэнт ЗША напісаў у Truth Social, што «Украіна пагадзілася не наносіць удары па расійскіх энергетычных аб'ектах, Расія пагадзілася рабіць тое ж самае».
Пазней Уладзімір Зяленскі заявіў, што Украіна гатовая спыніць удары, калі партнёры змогуць забяспечыць адмову Расіі ад атак на ўкраінскую энергетыку, крытычную інфраструктуру і маршруты перавозкі харчавання. «Украіна не ўпэўненая, што Расія мае жаданне выконваць якія-небудзь дамоўленасці», — паведаміў Зяленскі.
На апошніх перамовах у Маскве паміж амерыканскай дэлегацыяй і Уладзімірам Пуціным рашэнне аб энергетычным перамір'і не прымалася, паведаміла «Агенцтву» расійская крыніца, знаёмая з ходам перамоў.
«Экспромт Трампа», — сказаў суразмоўца «Агенцтва».
Financial Times адзначыў, што заява Трампа заспела ўкраінскіх чыноўнікаў знянацку. Крыніца FT, знаёмая з расійскай пазіцыяй, пацвердзіла, што Масква і Кіеў аднавілі абмеркаванне магчымага энергетычнага перамір'я. Аднак суразмоўцы газеты, знаёмыя з настроямі ў Крамлі, сцвярджаюць, што Пуцін не хоча заключаць такое пагадненне перад зімой.
Паводле іх слоў, у Маскве разлічваюць, што ўдары па ўкраінскай энергетыцы ў халодны сезон узмоцняць ціск на Кіеў і прымусяць яго пайсці на саступкі.
Падчас візіту ў Ірландыю ў нядзелю прэзідэнт ЗША заявіў, што ўкраінскія ўдары па расійскіх прадпрыемствах па вытворчасці дызельнага паліва «наносяць шкоду ўсяму свету». Ён заявіў, што папрасіў Зяленскага спыніць удары.
Цяпер чытаюць
Дырэктар Віцебскага цэнтра сучаснага мастацтва Андрэй Духоўнікаў пераехаў у Сербію — ён расказаў пра даносы ў культуры, неадукаванасць міністраў і чый жа Шагал
Каментары
[