Расійскі «Афрыканскі корпус» вярнуў кантроль над Кідалем праз паўгода пасля страты горада
Упершыню ўзяць Кідаль у лістападзе 2023 года змаглі наёмнікі ПВК «Вагнер». У красавіку яны пакінулі горад.
Расійскія вайскоўцы з «Афрыканскага корпуса» сумесна з арміяй Малі вярнулі кантроль над горадам Кідаль на паўночным усходзе краіны. Як сцвярджаюць расійскія вайскоўцы, аперацыя па наступе на гэты горад праводзілася з 1 па 7 кастрычніка пры падтрымцы авіяцыі, піша Бі-бі-сі.
Урад Малі амаль 10 гадоў не мог усталяваць кантроль над Кідалем, які быў захоплены туарэгамі, што выступаюць за стварэнне на поўначы краіны незалежнай дзяржавы Азавад.
Упершыню ўзяць Кідаль у лістападзе 2023 года змаглі наёмнікі ПВК «Вагнер», пасля чаго расійскі МЗС павіншаваў урад у Бамака з гэтым дасягненнем. Аднак пасля смерці Яўгена Прыгожына, калі пазіцыі наймітаў у Малі заняў падведамасны расійскаму Мінабароны «Афрыканскі корпус», сітуацыя для рэжыму Асімі Гойты імкліва пагоршылася.
У красавіку 2026 года стала вядома, што Кідаль зноў быў пакінуты. Гэта стала адчувальным іміджавым ударам для ўрада Малі. Цяпер улады краіны заяўляюць пра новую паспяховую аперацыю на гэтым напрамку. Пры гэтым адкрытым застаецца пытанне, як доўга ўдасца ўтрымліваць кантроль над горадам.
Адзін з актывістаў «Фронту вызвалення Азавада» сказаў Рускай службе Бі-бі-сі ў адказ на пытанне пра сітуацыю ў Кідалі: «Кідаль быў выкарыстаны ў палітычных мэтах; у бліжэйшыя тыдні вы атрымаеце адказ на гэтую сітуацыю»
Каментары