У Беларусі спрашчаюць працэдуры падрыхтоўкі і выдачы дазвольных дакументаў на будаўніцтва. Адпаведную пастанову Савета міністраў падпісаў прэм’ер-міністр Аляксандр Турчын.
Дакумент уносіць змены ў парадак падрыхтоўкі і выдачы дазвольнай дакументацыі на будаўніцтва, зацверджаны пастановай урада № 735 ад 18 снежня 2025 года.
Згодна з новымі правіламі, выкананне тэхнічных патрабаванняў і ўмоў для падключэння аб’екта да інжынерных сетак стане падставай для бясплатнай і безумоўнай перадачы аб’ектаў інжынернай інфраструктуры органам і арганізацыям, якія выдалі гэтыя патрабаванні і ўмовы.
Таксама ў тэхнічныя ўмовы для будаўніцтва забаронена ўключаць нормы і патрабаванні, якія не тычацца канкрэтнага аб’екта.
Скарачаюцца і тэрміны адміністрацыйных працэдур. Мясцовыя органы ўлады павінны будуць прымаць рашэнне аб выдачы дазвольнай дакументацыі на працягу 10 працоўных дзён замест ранейшых 15. Пры гэтым дакументы заяўніку неабходна накіраваць не пазней чым праз тры працоўныя дні пасля прыняцця рашэння.
Тэрмін выстаўлення ўпаўнаважанай арганізацыяй рахунку за падрыхтоўку дакументаў па запыце заказчыка скароцяць з пяці да трох прыцоўных дзён.
Акрамя таго, заказчыкі змогуць пачынаць працэдуру атрымання дазвольнай дакументацыі адначасова з узгадненнем месца размяшчэння зямельнага ўчастка, не чакаючы афармлення адпаведнага акта. Паводле інфармацыі ўрада, гэта адпавядае прынцыпу «аднаго акна» і дазволіць хутчэй прыступаць да рэалізацыі інвестыцыйных праектаў.
Адначасова змены ўнясуць у адзіны пералік адміністрацыйных працэдур для суб’ектаў гаспадарання, зацверджаны пастановай урада № 548 ад 24 верасня 2021 года. У ім таксама замацуюць скарачэнне тэрміну выдачы мясцовымі органамі ўлады дазвольнай дакументацыі на будаўніцтва з 15 да 10 працоўных дзён.
Дарадца прэзідэнта Польшчы пракаментаваў зварот Калеснікавай і Золатавай: Лукашэнка выпускае некалькі дзясяткаў вязняў, а на наступны дзень затрымлівае новых2121
Каментары