Выступіў на сходзе — атрымай 10 сутак!

Супрацоўніка аддзела культуры Валожынскага райвыканкама арыштавалі за выступ на паседжанні па вылучэнні дэлегатаў на Усебеларускі сход.

«Мой сын прыгожа спявае. А цяпер, мабыць, паляціць з працы», — са скрухай гаворыць Марыя Карацюк. Яе 28-гадовы сын Віталь быў удзельнікам паседжання па вылучэнні дэлегатаў на Усебеларускі сход. Паседжанне праходзіла ў раённым Цэнтры культуры 27 кастрычніка. Цяпер Віталь адбывае 10-суткавае пакаранне.

На сход прыйшло каля 400 чалавек. Спачатку выступалі імаверныя дэлегаты, а напрыканцы быў запланаваны канцэрт. У ім мусіў удзельнічаць Віталь, супрацоўнік аддзела культуры райвыканкама. Расказвае Марыя Іванаўна. Сын быў троху выпіўшы. Гэта нібыта заўважыў хтосьці з арганізатараў канцэрту і папрасіў хлопца сысці са сцэны. Той спусціўся ў залу.

А тут кіраўнік райвыканкама пытае, ці жадае яшчэ хто з прысутных выступіць. Віталь і захацеў. Са сцэны ён раскрытыкаваў выступоўцаў, большасць з якіх былі мясцовыя чыноўнікі. Сказаў, што хопіць, маўляў, ужо пустой балбатні, наслухаліся. Тут яму адключылі мікрафон, а затым вывелі са сцэны і адвезлі ў пастарунак.

«Ён такі ціхі, такі спакойны, а тут нешта павярнулася ў галаве. Ён жа талковы, ўсё разумее», — кажа Марыя Іванаўна. Па яе словах, на выступ Віталя рэагавалі па-рознаму: «Сядзела ў залі баб’ё, то крычалі, што ён малайчына, адзін праўду не пабаяўся сказаць».

З меркаваннем, што на сход Віталь Карацюк прыйшоў нецвярозы, згодныя не ўсе. «Гэта прыдумалі, каб было за што арыштаваць», — кажа паэт Алесь Пісарык. Гісторыю пра Карацюка ён пачуў ад сяброў, што былі на тым сходзе. Вылучэнне дэлегатаў ад Валожыншчыны здымалі некалькі дзяржаўных тэлеканалаў.

Начальнік аддзела культуры райвыканкама Вікенцій Адамовіч адмовіўся каментаваць інцыдэнт з удзелам свайго падначаленага.

«Я нясу за яго персанальную адказнасць. Таму гэта мусіць мяне хваляваць у найпершую чаргу».

Марына Тур, загадчыца раённага Цэнтра культуры, дзе адбыўся сход, заявіла, што нічога не ведае пра здарэнне.

«Што вы такое кажаце, я такога не чула! У нас усё цудоўна, усе мерапрыемствы адбываюцца на высокім узроўні. І ніякіх здарэнняў у нас не было».

«НН» будзе сачыць за развіццём падзей у Валожыне.

***

Хто прадставіць Валожыншчыну на Усебеларускім сходзе

Як адзначаецца на сайце Валожынскага райвыканкама, 27 кастрычніка ў раённым Цэнтры культуры адбыўся сход упаўнаважаных, якія прапанавалі на чацвёрты Усебеларускі сход наступных кандыдатаў:

1. Навумовіч Уладзімір Антонавіч, 1955 г.н., вышэйшая адукацыя, старшыня Валожынскага раённага выканаўчага камітэта;

2. Сінякоў Уладзімір Яўцехавіч, 1947г.н., вышэйшая адукацыя, намеснік старшыні Сталай камісіі па праблемах Чарнобыльскай катастрофы, экалогіі і прыродакарыстання парламента;

3. Крайко Валерый Пятровіч, 1954 г.н., вышэйшая адукацыя, старшыня Мінскага абласнога Суда;

4. Барушка Міхаіл Уладзіміравіч, 1966 г.н., вышэйшая адукацыя, камандзір вайсковай часці 30695;

5. Залеская Валянціна Аляксандраўна, 1962 г.н., вышэйшая адукацыя, галоўны спецыяліст аддзела адукацыі Валожынскага райвыканкама;

6. Княжэвіч Антон Эдвардавіч, 1956 г.н., сярэдняя адукацыя, кіроўца аўтобуса ДУП «Аўтамабільны парк №14»;

7. Канановіч Ганна Міхайлаўна, 1981 г.н., вышэйшая адукацыя, начальнік аддзела па справах моладзі Валожынскага райвыканкама, дэпутат Валожынскага раённага Савета дэпутатаў XXVI склікання;

8. Русакевіч Рыгор Мікалаевіч, 1946 г.н., вышэйшая адукацыя, старшыня Валожынскай раённай арганізацыі ветэранаў, ветэран вайны ў Аўганістане;

9. Скрундзь Яўген Яўгенавіч, 1956 г.н., вышэйшая адукацыя, старшыня СВК «Пяршаі-2003», дэпутат Мінскага абласнога Савета дэпутатаў.

10. Шчэрбітаў Пётр Паўлавіч, 1953 г.н., вышэйшая адукацыя, галоўны інжынер УП «ВоАна-Лад».

• 0
• 0
• 0
• 0
• 0
• 0
• 0
• 0