Будучы суседкай Беларусі, Літва не можа з ёй не размаўляць, а з ізаляцыяй не згодна ўся Еўропа, кажа старшы дарадца прэзідэнта Літвы Далі Грыбаўскайце па пытаннях знешняй палітыкі.
З іншага боку, па словах Явіты Нелюпшэне, уводзячы мэтавыя санкцыі, Еўропа шле выразны сігнал рэжыму Аляксандра Лукашэнкі, які парушае фундаментальныя правы чалавека.
«Не мець зносін, будучы суседзямі, немагчыма. Маючы мяжу працягласцю амаль 700 км, цесныя і сталыя гістарычныя, гандлёвыя і культурныя сувязі, абарваць іх нерэальна.
Уся Еўропа прызнае, што ізаляцыя невыгадная і не апраўдвае сябе», — сказала Нелюпшэне BNS.
Паводле яе слоў, нельга адмежавацца ад рашэння мноства агульначалавечых, эканамічных, транзітных, прыродаахоўных, культурных праблем, праблем бяспекі і інш
«Акрамя таго, нам не стварыць добры прыклад дэмакратыі ніяк інакш, як толькі стварыўшы для простых беларусаў магчымасць адчуць яе на вуліцах Вільні або ўякой-небудзь іншай еўрапейскай сталіцы. Гэта відавочна», — сказала дарадца прэзідэнта.
«Асобнае пытанне — мець кантакты і якія мець кантакты з палітычным рэжымам.
Тут таксама відавочна, што выразны знак рэжыму, што парушае фундаментальныя правы чалавека, павінен быць. У выпадку з Беларуссю гэты знак — мэтавыя акцыі ў дачыненні да канкрэтных спонсараў рэжыму — забарона на візы і прыпыненне эканамічных сувязяў», — сказала Нелюпшэне.
Дарадца прэзідэнта падкрэсліла, што
«ў сэнсе нацыянальнай бяспекі лепш, калі Беларусь з’яўляецца незалежнай дзяржавай, якая сама прымае галоўныя рашэнні».
«Лагічны вывад з гэтага ўсяго — палітыка «двухбаковай дарогі», якой прытрымліваюцца і Літва, і ўвесь Еўрасаюз (ЕС).
Больш эфектыўнай палітыкі, якая дазволіла б знайсці баланс паміж павагай да дэмакратыі і правоў чалавека і рацыянальнымі прагматычнымі інтарэсамі, пакуль няма», — сказала дарадца.
Каментары